Тых жа пратэстоўцаў, якія ўжо адбылі пакаранне за ўдзел у антыінтэграцыйных акцыях, ізноў кінулі за краты. Актыўных караюць штрафамі, а самых актыўных – і штрафамі, і соднямі ў ізалятары.
Глядзіце сюжэт у выданні «Аб’ектыву»:
Палітык Павел Севярынец не бачыў жонкі і сына 15 дзён. За акцыю дзеля абароны незалежнасці Беларусі 7 снежня яго пакаралі арыштам.
«У маёй 14-й камеры некалькі дзён перад гэтым утрымлівалі бяздомных. Ясна, што бяздомныя з вошамі. […] Не давалі пісьменніку Севярынцу асадкі. Тры асадкі ў мяне забралі пры даглядзе асабістых рэчаў. […] Ну і нарэшце ў апошнія двое содняў нам падкінулі чалавека з белай гарачкай. У яго былі розныя фантазіі, ён калабродзіў удзень і ўначы, і фактычна двое содняў мы не спалі», – распавядае пра сваё знаходжанне на Акрэсціна Павал Севярынец.
«Гэта сумна, канечне. Дзень народзінаў, Раство, Новы год – усё прайшло там, у чаканні. Адзіная радасць, што заўтра ў нас гадавіна шлюбу. Спадзяюся, мы пабудзем разам хоць адзін дзень», – кажа яго жонка Вольга.
Аднак усяго праз 5 гадзінаў пасля вызвалення суд Савецкага раёну Менску выдаў новы вердыкт: яшчэ 30 дзён арышту і 2625 рублёў штрафу за акцыі 20 і 21 снежня.
Арышт за абарону незалежнасці атрымаў і Дзмітрый Казлоў – аршанскі блогер, вядомы пад псеўданімам Шэры Кот. Сябры з Воршы ды Менску прыехалі сустракаць яго пасля 15-дзённага арышту. Аднак з брамы аршанскага ізалятару часовага ўтрымання Дзмітрый так і не выйшаў. Пра лёс блогера сябры даведаліся толькі пасля таго, як падалі заяву аб ягоным знікненні. Адрэагаваў міліцыянт у цывільным.
«Паглядзеў маю заяву, сказаў, што Дзмітрый Казлоў знаходзіцца ў іх, што ён адбывае адміністратыўны арышт паводле іншай пастановы», – распавядае грамадскі актывіст Максім Вінярскі.
Агулам 30 дзён за кратамі правядзе і блогер YouTube-каналу «Страна для жизни» Сяргей Ціханоўскі. 11 студзеня гомельца павінныя былі вызваліць з-пад арышту за ўдзел у пратэсце 21 снежня. Аднак суддзя Аляксандр Мохараў прысудзіў Ціханоўскаму яшчэ 15 содняў.
«Напэўна Лукашэнка з Пуціным ужо дамовіліся, і не патрэбна, каб быў нейкі шум. Пра цану нафты, газу ўжо, напэўна, дамовіліся», – іранізуе блогер.
Міліцыянты абвінавацілі блогера ў тым, што ён выкрыкваў «Жыве Беларусь!» і махаў сцягам, хоць Ціханоўскі ўвесь час вёў жывую трансляцыю.
«Ні штрафу не даюць, нічога! Ты бачыш! Толькі 15 содняў!» – не хавае абурэння прысудам Сяргей.
Удзельнікаў акцыяў дзеля абароны незалежнасці караюць, бо ўлады баяцца грамадзянскай актыўнасці – канстатуе праваабаронца Ігар Казмярчак:
«Гэтыя пратэсты хай сабе і за добрую ідэю, але зусім на тармазах спускаць іх немагчыма. Таму зараз і караюць: тых, хто больш публічны, – соднямі, тых, хто менш публічны, – штрафамі. А штрафы велізарныя», – уражаны праваабаронца.
1530 рублёў штрафу – столькі прысудзілі Алесю Чахольскаму. Ён адзін з нямногіх грамадскіх актывістаў, якога пасля вызвалення з-пад арышту ўлады не пакаралі паўторна.
«Згодна з артыкулам 356.2 Крымінальнага кодэксу Рэспублікі Беларусь, гэта называецца здрада дзяржаве. Усе гэтыя людзі, якія затрымлівалі, якія складалі пратаколы, якія судзілі, падлягаюць гэтаму крымінальнаму артыкулу, таму што я бараню незалежнасць, а яны дзейнічаюць у інтарэсах чужой краіны – Расейскай Федэрацыі», – перакананы сябра КХП БНФ Алесь Чахольскі.
Мітынгі і шэсці дзеля абароны незалежнасці Беларусі прайшлі ў Менску 7, 8, 20 і 21 снежня. Іх удзельнікі перакананыя: калі план паглыблення інтэграцыі з Крамлём, які так і не быў агучаны, падпішуць, ён прывядзе да паглынання Беларусі Расеяй. За ўдзел у пратэстах штрафамі ды арыштам улады пакаралі больш за 40 чалавек.
Аляксандр Папко belsat.eu
