Аб'ектыў 27.04.2019 Незалежныя прафсаюзы не збіраюцца аплочваць першаймайскую акцыю


Незалежнікі следам за арганізатарамі «Чарнобыльскага шляху» не збіраюцца гуляць паводле новых правілаў.

«Трэба наагул сябе не паважаць, каб плаціць грошы невядома каму і за што. Тым больш мы існуем не за гранты, а за кошт унёскаў, якія нам пералічваюць чальцы нашых прафсаюзаў», – кажа Аляксандр Ярашук з Беларускай канфедэрацыі прафсаюзаў.

Дамаўляцца на ахову з міліцыяй трэба было і раней. Але напрыканцы студзеня ўрад прыняў пастанову аб новым парадку арганізацыі масавых мерапрыемстваў. Паводле яе, кошты аховы і працы хуткай дапамогі выраслі ў разы. Апазіцыя змены можа і праглынула б, калі б не інцыдэнт 24 сакавіка: тады «аплочаныя» заяўнікамі праваахоўнікі не саромеліся на вачах тысячаў беспадстаўна «вязаць» у тым ліку і арганізатараў акцыі.

Відэрэпартаж пра арганізацыю акцыяў пасля з’яўлення «падатку на акцыі» глядзіце ў поўным выданні навінаў за 27 красавіка

Будуць вымушаныя адмовіцца ад правядзення акцыяў шматлікія рэлігійныя і грамадскія арганізацыі. Так, гарадзенскія каталікі ў верасні не пойдуць у традыцыйную пілігрымку ў Капцёўку – прынамсі такі ліст ад святароў распаўсюджваецца сярод вернікаў. Курыя з каментарамі пакуль узяла паўзу. Затое ўжо публічна нашаму каналу аб такіх жа праблемах заявілі аматары спінінгу і нахлысту. Яны не ведаюць, як знайсці на ахову штогадовага спаборніцтва дваццаці чалавек каля тысячы долараў.

«Нават па вялікаму рахунку суботнік, не арганізаваны дзяржавай, а зыніцыяваны грамадзянамі, будзе прызнаны такой акцыяй. Усё залежыць ад таго, як на гэта паглядзяць міліцэйскія і ўсе іншыя адміністрацыйныя органы. Заканадаўства ў гэтым сэнсе можна назваць гумовым», – кажа праваабаронца Беларускага Хельсінскага камітэту Алег Гулак.

Расцэнкі на паслугі міліцыі пачынаюцца ад трох базавых велічыняў, калі ўдзел у падзеі возьмуць да дзесяці чалавек, і складзе амаль $ 2000, калі больш за тысячу чалавек. Пры тым няважна, мае ініцыятыва важны грамадскі (то бок, канстытуцыйны) характар ці камерцыйны. Пакуль жа з вялікіх акцыяў толькі на сёлетні Дзень Волі праз краўдфандынг удалося сабраць неабходную суму.

І з году ў год – усё больш. Сёлетні бюджэт Беларусі прадугледжвае рост на 9 % выдаткаў на суды і праваахоўныя органы.

Алесь Залеўскі, «Белсат»

Глядзі таксама
Каментары