Беларускія вайскоўцы рыхтуюцца да надзвычай напружанага ды насычанага году. Да прыкладу, Генштаб мае намер кардынальна перагледзець план абароны нашае краіны, які будзе распрацаваны сумесна з дзяржаўнымі органамі. З чым звязаная новая вайсковая стратэгія ды ад каго Беларусь плануе абараняцца?
Беларусы – мірныя людзі, але порах трэба трымаць сухім. Неаднойчы за апошні час Лукашэнка, кіраўнік Беларусі і галоўнакамандуючы, агучваў у адным сказе гэтыя супрацьлеглыя тэзісы. Цягам апошніх гадоў увага да ўнутранай бяспекі расце.
«Мне падаецца, што змены выкліканыя, галоўным чынам, падзеямі ва Украіне. Гэта і анексія Крыму, і канфлікт на Данбасе», – кажа Аляксандр Алесін, вайсковы аглядальнік.
І гэты канфлікт закрануў, бадай, увесь рэгіён. Перафарматоўваюць і змяняюць свае планы наконт абароны і нашыя суседзі. Гэтак, Варшава анансуе цягам бліжэйшых гадоў істотныя карэктаванні ў арміі ды ў планах абароны. На ўсходзе Польшчы неўзабаве з’явіцца новая дывізія.
«Польша мусіць быць гатовая да найгоршага сцэнара – то бок класічнага вайсковага канфлікту з ужываннем вялікай колькасці танкаў і артылерыі. Але таксама гэтая чацвёртая дывізія мусіць быць у стане адказаць на ўсе пагрозы меншага ўзроўню: баевікоў, нейкі гібрыдны канфлікт», – адзначае Анджэй Гладый, аналітык парталу «Defence24.pl».
Вайсковыя аглядальнікі адзначаюць, што сучасная вайна пачынаецца не з наўпроставага нападу, а з гібрыдных аперацыяў. Таму вайсковая дактрына нашай краіны, прынятая ў 2016 годзе, прадугледжвае не столькі замежную агрэсію і адказ на яе, колькі патрабуе аналізу такіх момантаў, як зніжэнне коштаў на нафту ў свеце, а таксама каляровых рэвалюцыяў.
«Кіраўніцтва краіны лічыць, што калі і пачнецца вайна, то гэта будзе гібрыдная вайна. Не будзе нечаканага вайсковага вонкавага нападзення, а пачнецца з нейкага аналагу Памаранчавай рэвалюцыі», – адзначае Аляксандр Алесін, вайсковы аглядальнік.
Да гэтага і рыхтуюцца айчынныя вайскоўцы: дзеянні ў гарадскіх умовах, мадэрнізацыя мабільных сілаў хуткага рэагавання. Яшчэ адзін і ці не галоўны чыннік, які ўплывае на развіццё арміі, – супрацьстаянне паміж NATO і Расеяй. Тут Беларусь апынулася нібы паміж молатам і кавадлам.
«Дамовы аб саюзнай дзяржаве проста абавязваюць Беларусь праводзіць з Расеяй адзіную замежную палітыку, абарончую палітыку, і тут мы ўжо аніяк не адкруцімся. Тым больш што такія крокі зробленыя раней», – кажа Ягор Лебядок, вайсковы эксперт.
Таму ўслед за Расеяй і Беларусь пачынае больш увагі надаваць арміі, фінансаванню ў тым ліку. Гэтак, налета на ўзброеныя сілы збіраюцца выдаткаваць з бюджэту краіны паўтара мільярда рублёў – на чатырыста тысячаў болей, чымся ў гэтым годзе. Адначасова на адукацыю ці на ахову здароўя пойдзе толькі па адным мільярдзе рублёў.
Сяргей Скулавец, belsat.eu
Фота: Viktor Drachev / TASS / FORUM