Аб'ектыў 22.11.2016 Лукашэнка доўга чакаў Пуціна, каб атрымаць хоць штосьці


Ранішні прылёт беларускага борта № 1 у Маскву расейскія медыі праігнаравалі.

Суцэльную ўвагу журналістаў забраў «Форум дзеянняў» Агульнарасейскага народнага фронту з удзелам прэзідэнта. Уладзімір Пуцін на спатканне з беларускім калегам відавочна не спяшаўся.

Шматгадзіннае чаканне Лукашэнкі ля крамлёўскіх сценаў невыпадковае, мяркуе палітычны аглядальнік Аляксандр Класкоўскі.

«У Маскве ўсё адно Беларусь расцэньваюць як малодшую сястру і тут маючы на ўвазе вялізную эканамічную залежнасць, безумоўна, не без таго – не без паказу хто ў доме гаспадар».

Тэмы перамоваў да прыемных не належаць

Пра гэта Лукашэнка заявіў на прэс-канферэнцыі для расейскіх медыяў, анансуючы свой прыезд у Маскву. Кіраўнік Беларусі востра выказаўся пра адсутнасць прагрэсу ў стасунках з Масквою.

Галоўнае пытанне – эканамічныя дачыненні

А гэта – страты беларускага бюджэту ў сувязі з расейскім крызісам і няспынныя харчовыя войны. І яшчэ адное адвечнае – пытанне коштаў на расейскія вуглевадароды. Газавы канфлікт паміж суседкамі цягнецца ўжо амаль год.

«У Маскве Лукашэнку цікавяць газ і крэдытаванне нашай эканомікі. Ён не спраўляецца з крызісам, які працягваецца ўжо нейкі час», – кажа малады мужчына.

«Візіт нічога не значыць. Нікчэмнае бавенне часу. Тое самае як ён паляцеў адпачыў у Катары, і па ўсім свеце адпачывае з Коленькай», – яшчэ адно меркаванне менчука.

Гандаль з Крамлём будзе працягвацца

«Лукашэнка едучы ў Маскву кожны раз думае, як кажуць «С паршивой овцы хоть шерсти клок» – ухапіць хоць што. Цяпер, калі не даюць яны зніжку на газ наўпрост, то трэба дамагчыся хаця б міжбюджэтнай кампенсацыі, якую Масква нібыта паабяцала, а пазней кажа: нам тут трэба цэлы пакет дакументаў падпісаць. Які пакет – гэта загадка», – дадаў Аляксандр Класкоўскі.

Як мяркуе эксперт, можа зноў паўстаць пытанне расейскай авіябазы ў Беларусі.

А таму Лукашэнка не стамляецца шукаць палітычных дывідэндаў не толькі ад Масквы. На ўчорашнім спатканні з прадстаўнікамі Еўразвязу ён запрапанаваў зрабіць Менск глабальнаю перамоўнаю пляцоўкай паміж Усходам і Захадам, чым нагадаў вядомую прамову Астапа Бэндэра перад аматарамі шахматаў у правінцыйных Васюках.

І калі мэтаю Астапа Бэндэра было абдурыць правінцыяльных шахматыстаў, то Лукашэнка паставіў перад сабою значна больш высокую планку.

Вольга Жарнасек, «Белсат», фота: president.gov.by

Глядзі таксама
Каментары