Аб'ектыў 08.06.2018 Гурт TonqiXod сыграў апошні канцэрт


Гурт «ТонкіХод», які летась распаўся на самым узлёце, зноў з’яднаўся на сцэне клубу «Бруге» дзеля апошняга канцэрту.

Летась «ТонкіХод» выпусціў альбом «Колер, якога няма», а праз колькі месяцаў гурт заявіў пра заканчэнне дзейнасці. Апошняя кружэлка атрымала безліч прыхільных водгукаў ды некалькі ўзнагародаў, у тым ліку «Героі году» і адразу пяць дыпломаў прэміі «Эксперты.by». Прызам ад фонду «Вяртанне» сталася арганізацыя канцэрту. Таму давялося вяртацца.

Такая сітуацыя колькі гадоў таму была ў гурта «Пукстбэнд», які распаўся неўзабаве пасля трыумфу на прэміі «Эксперты.by». Сяргей Пукст мяркуе, што праекты з такою складанай і нефарматнаю музыкаю, як «ТонкіХод», не вытрымліваюць ледніковага перыяду беларускага шоу-бізнесу:

«Вось ёсць пэўная кропка, якой ты дасягаеш. І, строга кажучы, лакальны рынак і лакальная структура шоу-бізнесу не прапаноўвае музыкам далейшага руху ды магчымасцяў для далейшага існавання, якое не звязанае выключна з іхным энтузіязмам».

Творчыя шляхі музыкаў паступова разыходзяцца, усе яны ўжо граюць у іншых камандах. Бубнач Андрэй Аляксеенка выступае ў гурце «Ірдарат». А вершы Уладзя Лянкевіча ды ягоны заварожвальны рэчытатыў мы пачуем у новым праекце «Эрык і я», які яны стварылі разам з музыкам Эрыкам Арловым-Шымкусам. Наваспечаны гурт рыхтуецца выступіць сёлета на фестывалі «Басовішча» ў Гарадку ў Польшчы:

«Такі дуэт, дзе ёсць электронны біт, электронныя клавішы, мая гітара, мае тэксты і, умоўна кажучы, магчыма, нешта больш сучаснае гучаннем», – адзначае Уладзь Лянкевіч.

Клавішнік Максім Субач, які ўласна пакінуў «ТонкіХод» дзеля сольнай карʼеры, таксама абяцае хутка прэзентаваць інструментальны праект, у якога пакуль няма назвы.

«Канцэпцыя праекту заключаецца ў тым, што я прыдумляю сваю музыку і запрашаю розных музыкаў, якія выконваюць пэўныя партыі. Нешта такое ў бок акадэмізму і джаза, але не без прагрэсіўнага року», – адзначае клавішнік Максім Субач.

Апошніх канцэртаў у «ТонкагаХоду» было ўжо некалькі, але гэты, здаецца, сапраўды апошні апошні, і прайшоў ён з аншлагам.

Аляксандра Дорская, «Белсат»

Фота вокладкі – novychas.by

Глядзі таксама
Каментары