Меўся быць новы трубаправод, а зʼявілася балота і нязносныя ўмовы. Жыхары вуліцы Свірыдава ў Гомлі кажуць, што ўжо паўгода пакутуюць ад працаў, якія вядзе «Гомельаблцепласетка».
«Няма такіх словаў, якімі можна абазваць гэтых начальнікаў, якія займаюцца трубаправодамі».
Знішчаныя дзіцячая пляцоўка, ходнікі і зялёная зона. Усё гэта – наступствы рэалізацыі праекту, які афіцыйна называецца«Мадэрнізацыя ўчастку цеплавой сеткі».
«Усё паламалі. Што гэта такое!!!! Калі яны гэта зробяць?»,
«Раскапалі ўсё, з дзецьмі не выйсці. Ні пагуляць, нічога. Выйдзеш – па калена ў гразі»,
«Нязручна маладым мамам, нязручна дзецям на роварах. Зараз будзе зіма, будзе яшчэ горш. Будзе слізка і яміны».
Адметна, што на пашпарце абʼекту няма ні даты пачатку працаў, ні канца рэалізацыі праекту. А такое становішча не адпавядае прынЯтым нормам. Абураныя людзі не аднойчы звярталіся да выканаўцаў мадэрнізацыі цеплавой сеткі з патрабаваннямі даць адказ: калі на іхную вуліцу вернецца доўгачаканы лад?
«Я тэлефанавала гэтаму Гайдуку ці як яго там. Ён сказаў, што вясною. А што да вясны?»
Пасля таго, як на Свірыдава зʼявіліся журналісты, інфармацыя наконт канца мадэрнізацыі пачала змяняцца. У сённяшняй размове з »Белсатам« адказны за вытворчасць працаў Алег Гайдук паінфармаваў, што добраўпарадкаванне тэрыторыі адбудзецца яшчэ да канца гэтага года. Ці верыць гэтым словам – людзі не ведаюць. Але дакладна вядома, чаго жыхары Свірыдава сёлета і пазней не дачакаюцца. Ужо трыццаць гадоў тут няма нармальнае дарогі. Шматлікія просьбы зацікаўленых дасюль ігнаруюцца.
«Начальнік домаўпраўлення адказвае: вы дваравая гаспадарка і мусіце за свае грошы рабіць. Мусіце складвацца, каб адрамантаваць дарогу».
Вядома, што за свае грошы дарогу жыхары вуліцы пабудаваць не здолеюць.
«Я ўсё на сваю слепату перакладваю. Дачка вядзе дык зігзагам даводзіцца ісці»
І не выключана, што новае дарогі на вуліцы Свірыдава давядзецца чакаць ці не наступныя трыццаць гадоў.
Ян Бабіцкі, «Белсат»