Хацелі прыцягнуць кліентаў, але прыцягнулі скандал. Сетка «Бургер Кінг» на доўгіх выходных у Горадні і Берасці паабяцала немалую зніжку тым, хто мае карту паляка. Але прапанова не ўсцешыла ўладальнікаў карты, а нават абурыла. Сярод незадаволеных і тыя, каму давялося плаціць поўны кошт.
І як карта паляка, толькі карта курчака. А з ёй і немалая зніжка – мінус 25 % на «Чыкен Фры». Аднак смачная прынада для ўладальнікаў карты паляка стала… косткай у горле. Бо не ўсе ўладальнікі нелюбімага ўладамі Беларусі дакументу гатовыя паказваць яго ў нашай краіне. Не даспадобы польскай меншасці і гульня з назовам карты – ці то паляка, ці то курчака. Хаця не ўсе берасцейцы і гарадзенцы такія пераборлівыя.
Жыхары Горадні:
«Магічнае слова «зніжка». Зніжка заўсёды добра. Таму ў якім бы выглядзе яе ні прапаноўвалі – гэта цудоўна».
«25 % з курыцы – гэта добра, добра!»
На грашовыя прывілеі ў страўнях для польскай меншасці ў Горадні і Берасці беларуская большасць адрэагавала без энтузіязму.
Жыхары Горадні:
«Чаму ім зніжкі, а беларусам не?»
«Неяк несправядліва, што нашым не робяць зніжкі, а тым, хто некуды яшчэ ездзіць і мае карту паляка, то робяць».
Але найбольш кіпела абурэнне пад рэкламнымі пастамі кампаніі ў сацыяльных сетках. Кампанія як магла апраўдвалася.
Разлік кампаніі, відавочна, быў такі: уладальнікаў карты паляка ў Беларусі – блізу ста тысяч чалавек. Калі яны прывядуць сяброў, то выгада яшчэ ўзрасце. Вось толькі выручка не павялічылася, бо, як удалося высветліць у працаўнікоў страўні, скарысталіся акцыяй толькі некалькі чалавек.
«Яны стварылі прэцэдэнт нацыянальнай сегрэгацыі. Г. зн. людзям, якія дэкларуюць сябе палякамі, даюць 25 адсоткаў зніжкі на тэрыторыі Беларусі. Ды не важна дзе, у любой краіне – гэта апартэід фактычна», – кажа публіцыст Севярын Квяткоўскі.
Публіцыст перакананы, што маркетолагі памылкова не атаясамілі карту паляка… з нацыянальнасцю.
«Людзі не разумеюць, што такое карта паляка, яны думаюць, што гэта проста бонус, халява толькі таму, што твая бабуля ці дзядуля нарадзіліся на тэрыторыі Заходняй Беларусі. А насамрэч «народ польскі» – гэта значыць польская нацыя. І калі чалавек атрымлівае карту паляка, то ён дэкларуе сваю прыналежнасць да польскай нацыі», – кажа Севярын Квяткоўскі.
Абураныя як уладальнікі карты паляка, гэтак і яе крытыкі. Яны сыходзяцца ў адным – у спадзяванні, што маркетолагаў будзе чакаць разбор палётаў, па выніках якога яны даведаюцца не толькі, як смакуе, але і як лётае бургераўскі курчак.
Вольга Старасціна belsat.eu
