Аб'ектыў 31.08.2019 Ад Колі да Мікалая. Малодшаму Лукашэнку – 15


Быў і Коленькам, і Колем, а цяпер – не інакш як Мікалай. Малодшы сын кіраўніка краіны адзначае пятнаццаты Дзень народзінаў. Праз тры гады – поўнагадовы, праз дваццаць – ужо можа балатавацца на прэзідэнцтва.

Аднак, як сам неаднаразова прызнаваўся, гэтая пасада яго не вабіць. І сапраўды, нягледзячы на свой малады ўзрост, дзевяцікласнік Мікалай Лукашэнка паспеў адчуць на сабе ўсе «чары» прэзідэнцкага жыцця. Ужо ў сямігадовым узросце – атрымаў пагоны генерала. Быў побач з бацькам і на выбарах, і на інаўгурацыі, і нават у метро – адразу пасля выбуху.

«Гэта самае няшчаснае дзіцё з тых, якіх я бачыў. Вы разумееце, у яго жыццё – гэта бацька, які яго паўсюль цягае. А Коля (мы гэта і ў нашай сатырычнай праграме «Эксперт» выкарыстоўваем), Коля – ён жа павінен быць і нармальным. У ім абавязкова ўсё ёсць гэтае нармальнае», – кажа рэжысёр Юрый Хашчавацкі.

Шматкроць Лукашэнку крытыкавалі, што той адрывае дзіця ад школы. Замест заняткаў Коля дарыў падарункі Пуціну і першай лэдзі Кітаю, паціскаў руку Папу Рымскаму ды збіраў кавуны ў прэзідэнцкай сядзібе. Аднак апошнім часам заўважна пасталеў. На публіцы з’яўляецца куды радзей, у «айфонах-плафонах» больш не сядзіць – займаецца пераважна хакеем ды біятлонам. Вучыць кітайскую. Грае на фартэпіяна ды выступае на розных імпрэзах, чым кожны раз расчульвае кіраўніка краіны. Той, у сваю чаргу, песціць сына дарагімі падарункамі. Раяль за $ 18 000, біятлонная вінтоўка за $ 3500 ды ровар за € 7500.

Падчас вулічнага апытання, чаго ж яшчэ няма ў дзіцяці, дзеля якога нават заняткі ў школах перанеслі на пазнейшы час, мы пачулі і пра «якую-небудзь частку Беларусі» і пра «верталёцік, каб у школу ў корках не ездзіць».

Матэрыял Сцяпана Святлова глядзіце ў поўным выданні навінаў за 31 жніўня

Чаго сапраўды не хапае малому Лукашэнку, дык гэта, бадай, звычайных чалавечых адносінаў. Чаго варты толькі той выпадак, калі на Еўрапейскіх гульнях да яго падышлі выпадковыя гледачы? І надзіва не яму, а ён сам прапанаваў ім сфатаграфавацца.

Глядзі таксама
Каментары