Мільён рублёў за тры гады. Гэткая сума была выдаткаваная з гарадскога бюджэту Менску на аплату незанятых кватэраў, што знаходзяцца на балансе выканкаму. Інфармацыю паведаміла газета «СБ: Беларусь сегодня» са спасылкай на камітэт Дзяржаўнага кантролю.
Забудоўнікі вось такіх дамоў перадаюць гораду частку кватэраў. Але навасёлаў гэтае жыллё, здараецца, чакае не адзін год.
Пустыя кватэры ў сталіцы назапашваюцца ўжо восьмы год. А некаторыя чакаюць гаспадароў і па 12 гадоў. Новых пустых кватэраў у Менску больш за паўтысячы – забудоўнікі трымаюць іх для жыхароў зруйнаваных дамоў, больш за трыста – гэтак званага другаснага рынку, дзясяткі чакаюць рамонту ці перабываюць у падменным фондзе. Менчукі, мякка кажучы, не ў захапленні:
«Ну што на гэта можна сказаць? Гэта не справядліва, гэта не чэсна».
«Бардак, як і шмат у якіх іншых рэчах. Куча інтэрнатаў пустых, а студэнтаў не засяляюць. Ведаю дакладныя сітуацыі».
«Чакаюць найлепшых часоў або павышэння курсу долара».
«Жыллёвая праблема – гэта найважнейшая праблема любой дзяржавы і любога кіраўніка. Таму трэба, каб усё было заселенае, каб людзі жылі, каб не мучыліся».
«Трэба раздаць гэтыя кватэры тым, хто мае патрэбу: дзецям, якія выходзяць з дзіцячага дому, шматдзетным сем’ям, дапамагчы людзям, якія не маюць грошай, якія за рысаю беднасці жывуць».
Толькі за апошнія тры гады па ім назбіралася камунальных плацяжоў на мільён рублёў. Яшчэ мільён і 200 тысячаў – запазычанасць за пустыя кватэры. А здавалася б – маглі быць прададзеныя ці прынамсі выстаўленыя ў арэнду.
«Сапраўды да працы Менгарвыканкаму ў менчукоў ёсць шмат пытанняў. І добра, што гэтыя пытанні ўзнікаюць у кантрольных структураў. Але ці з таго боку да Менгарвыканкаму падыходзяць кантралёры?» – кажа Віктар Янчурэвіч, памочнік дэпутата Палаты прадстаўнікоў.
Новыя кватэры гадамі чакаюць перадусім жыхароў прыватных жылых дамоў, якія яшчэ толькі ў планах на руйнаванне. То бок кожны забудоўнік фактычна аддае адсотак новых кватэраў у доме – Менгарвыканкаму. А тыя – стаяць гадамі, збіраюць даўгі і з часам ужо патрабуюць рамонту.
«Для таго, каб заахвоціць людзей пераязджаць у такія кватэры, можна ўводзіць паніжальныя каэфіцыенты арэнды. Або, каб гэтая арэндавая плата была адную базавую велічыню на пэўны тэрмін – з разліку таго, колькі трэба ўкласці ў яе рамонт. Даць грамадзянам зрабіць гэты рамонт самастойна, але плаціць некаторы час арэндавую плату», – працягвае Віктар Янчурэвіч.
Папярэдні кіраўнік сталіцы Андрэй Шорац справы з месца не зрушыў. Ці будзе больш гаспадарлівай новая адміністрацыя невядома. Але адмыслоўцы мяркуюць, што новыя выкрывальніцтвы хібаў на дзяржаўным узроўні азначаюць, што перадвыбарчая кампанія ўжо распачалася.
Галіна Абакунчык, belsat.eu
