«Шашлычны» сезон распачаты: як смачна паесці і пры гэтым не нашкодзіць здароўю?
Шашлык – не проста страва, а цэлая традыцыя, якая зрабілася неад’емнай часткай кулінарнай культуры беларусаў. З надыходам вясны свой мангал дасталі і мы, ды раскажам, як згатаваць смачную страву з дымком без шкоды для здароўя. І дапаможа нам у гэтым прафесіянал.
Для ўдалага паходу на шашлыкі трэба некалькі асноўных прадуктаў. Іх спіс можа быць вельмі шырокі.
«Мы ўзялі мяса, курыцу. Нам спатрэбіцца абавязкова гародніна, мы іх таксама замарынуем і пасмажыць і грыбы туды ж. Масла, кефір, гарчыца, соль, любыя заправы на ваш густ», – кажа Алеся Трыфан, нутрыцыёлаг, дыетолаг.
Каб ашчадзіць час, лепей падрыхтаваць прадукты да гатавання заранёў – памыць садавіну і гародніну, а таксама замарынаваць мяса. Існуе мноства відаў марынадаў, кожны з якіх надае мясу свой унікальны смак.
«Я аддаю перавагу не выкарыстоўваць алей, маянэз, нешта такое тлустае, тым больш калі мы бярэм свініну, то яна загадзя тлусцей, чым курыца напрыклад. Таму можна ўзяць кефір, натуральны ёгурт, мінеральную ваду, цытрынавы сок. Нешта такое. І любыя спецыі», – дадае Алеся Трыфан, нутрыцыёлаг, дыетолаг.
Такім жа чынам марынуем і багатую бялком курыцу. А каб зрабіць прыём ежы збалансаваным, трэба дадаць яшчэ некалькі простых прадуктаў.
«Нам пажадана дадаць яшчэ нейкія вугляводы, гэта можа быць хлеб, бульбачка ў мундзіры і шмат гародніны. З’еш вясёлку – такое правіла. Чым больш кветак гародніны ты набіраеш, тым лепш, тым больш атрымліваеш карысных усякіх вітамінаў, мінералаў і гэтак далей», – адзначае Алеся Трыфан, нутрыцыёлаг, дыетолаг.
Пакуль загатоўкі даходзяць, распальваем вогнішча.
Частку гародніны прыгатуем на адкрытым агні – баклажаны і кабачок. А таксама грыбы. Паводле эксперта, самы карысны спосаб гатавання мяса – варэнне або запяканне.
«Гэта даказаны факт, што мяса, якое смажыцца на адкрытым агні, на вогнішчы, зʼяўляецца канцэрагенным, яно шкоднае для здароўя. У прынцыпе не толькі на агні, любое смажанае мяса яно не зусім карысна», – кажа лекар з Ізраілю Барыс Брыль.
Аднак шкода ад смажанага мяса будзе невялікай, калі яго ўжываць рэдка. У адрозненне, напрыклад, ад алкаголю.
«Няма ніводнага даследавання, якое паказвае, што алкаголь карысны для здароўе. Апавяданні пра тое, што шклянка віна ці шклянка піва гэта карысна – гэта абсалютная хлусня. Усе даследаванні паказваюць зусім іншае.
Алкаголь шкодны для здароўя, ён выклікае вялікую колькасць захворванняў», – дадае Барыс Брыль, лекар з Ізраілю.
Перад тым як адправіцеся на шашлыкі, памятайце таксама пра пажарную небяспеку! Разводзьце агонь толькі ў адмыслова прызначаных месцах.
Гатаванне на адкрытым агні – найперш магчымасць бавіць час з сямʼёй і сябрамі. Кіруйцеся простымі правіламі, і яны дапамогуць захаваць вам не толькі настрой, але і здароўе.
Андрэй Сульжыц, «Белсат»
