Больш за 80% беларусаў не падтрымліваюць ідэі ўводзіць беларускія войскі на тэрыторыю Украіны
Афіцыйны Менск – на баку Расеі, але самыя беларусы ўдзельнічаць у развязанай Крамлём вайне не хочуць. Пацвярджае гэта і найноўшае сацыялагічнае апытанне, праведзенае ў нашай краіне.
Глядзіце сюжэт у нашым відэа:
У сярэдзіне сакавіка ў Беларусі апыталі тысячу рэспандэнтаў праз тэлефонныя званкі з мэтаю высветліць стаўленне да вайны ва Украіне. Большасць выказалася супраць увядзення войскаў, а дзве траціны – супраць выкарыстання тэрыторыі ды ваеннай інфраструктуры для ваенных дзеянняў. Такія лічбы агучыў прафесар, сацыёлаг Андрэй Вардамацкі:
«Тут дзве наймацнейшыя дыферэнцыйныя прыкметы – гэта адукацыя і нацыянальная ідэнтыфікацыя. Адукацыя проста лінейна ўплывае: чым большы адукацыйны ўзровень, тым менш станоўчых адзнак магчымага ўводу беларускіх войскаў робіцца. І беларусы, якія ідэнтыфікуюць сябе як беларусы, у меншай ступені – у два разы – ухваляюць магчымы ўвод беларускіх войскаў на тэрыторыю Украіны для вядзення баявых дзеянняў».
Паводле Андрэя Вардамацкага, аўтара даследавання, гэта той рэдкі выпадак, калі нацыянальны фактар у сацыялагічным даследаванні адыгрывае важную ролю. Здзіўляе сацыёлагаў і факт, што сярод тых, хто ўхваляе ўварванне, – людзі старэйшага веку.
Аднак эксперты ў адзін голас гавораць, што масавая свядомасць функцыянуе не паводле тых законаў, што экспертнае меркаванне. Яна рэагуе на падзеі больш павольна. А значыць, рэакцыя беларусаў яшчэ наперадзе.
«Калі глядзець паводле спецыфікі вобласцяў, то відавочным чынам – я глядзеў звесткі “Chatham House” – зацікаўленасць у інфармацыі або інфармаванасць пра падзеі ва Украіне падае з поўдня на поўнач, бо Берасцейская і Гомельская вобласці значна шчыльней адсочваюць інфармацыйную плынь. Віцебшчына – у найменшай ступені», – тлумачыць старэйшы эксперт Цэнтру новых ідэяў Генадзь Коршунаў.
Эксперты з асцярожнасцю прагназуюць вектары змены грамадскай думкі беларусаў. У сакавіку, паводле апытання, беларусы больш рэагавалі на эканамічныя наступствы вайны, чымся на саму вайну. Але называюць фактары, якія будуць уплываць на яго змену.
«Эканамічныя рэчы, эканамічныя санкцыі, эканамічныя наступствы і хто зойме ў масавай свядомасці месца вінаватага ў гэтым негатыве. Затым, а можа гэта будзе і важней, вынікі ваенных дзеянняў – як, груба кажучы, памыліцца Расея, як глыбока і хутка, ці не вельмі. З іншага боку, наколькі дзейснаю сілай пакажа сябе ЕЗ», – кажа старэйшы эксперт Цэнтру новых ідэяў Генадзь Коршунаў.
Андрэй Вардамацкі падкрэслівае, што апытанне зробленае да таго, як стала вядома пра зверствы расейскіх акупантаў у Бучы. І калі да абнародавання ваенных злачынстваў для беларусаў падзеі ва Украіне былі абстрактнай спецаперацыяй, то пасля сталіся канкрэтнай вайною.
Ніка Несцярэнка, «Белсат»
