Амаль у 6 разоў. Гэта паказнік абвалу продажаў аўтобусаў МАЗ на расейскім рынку за сёлетні чэрвень адносна аналагічнага мінулагодняга перыяду. Звесткі падае расейская аналітычная кампанія «Автосельхозмаш-холдинг».
Глядзіце сюжэт у нашым відэа:
Калі падрабязней, то за мінулы месяц прададзеныя былі 33 аўтобусы супраць 1888 у 2022-м. Прысутнасць МАЗу на расейскім рынку скарацілася на 17%.
«Зараз праблема не ў тым, што МАЗ не можа сабраць гэты аўтобус. Праблема, што не можа больш прадаць на расейскім рынку. Бо МАЗ не мае камерцыйных здзелак – заўсёды гэта пагадненні паміж Менгарвыканкамам і якой-небудзь дзяржаўнай установай у той ці іншай вобласці Расеі», – кажа блогер і бізнесовец Аляксандр Кныровіч.
На гэтым фоне МАЗ збіраецца будаваць у Менску новы вытворчы корпус плошчаю восем з паловаю гектараў. Закончыць будоўлю плануюць у 2025 годзе. Мэта – вырабляць да трох тысячаў аўтобусаў за год. Папярэдні кошт праекту – 100 мільёнаў долараў. Са словаў намесніцы кіраўніка Менгарвыканкаму Надзеі Лазарэвіч, спатрэбіцца і дадатковае фінансаванне. Маўляў, гэты момант ужо ўзгадніў Лукашэнка.
«Пад інвестыцыі ў нарошчванне магутнасці браліся крэдыты. Адпаведна будзе расці пазыковая нагрузка на прадпрыемства – гэта значыць, што з кожнага рубля выручкі ў два-тры разы больш сродкаў на абслугоўванне крэдытаў. Гэта, у сваю чаргу, прывядзе да зніжэння прыбытку і зніжэння магчымасці прадпрыемства выплачваць заробак», – дадае старэйшы навуковы працаўнік «BEROC» Алег Мазоль.
«Бізнес беларускіх дзяржпрадпрымальнікаў не ў тым, каб прадаваць і зарабляць прыбытак, а ў тым, каб засвойваць дзяржаўныя грошы. І тут як бы ідзе справа пра 100 мільёнаў, якія вылучаныя на гэтыя мэты Менгарвыканкамам, але гэтае будаўніцтва вялікае – там амаль 200 мільёнаў долараў», – выказвае думку Аляксандр Кныровіч.
Новы корпус МАЗу будзе мець адрас вуліца Сацыялістычная, 2. Яго паставяць усяго за 46 метраў ад найбліжэйшай жылой забудовы. Паводле экалагічнай арганізацыі «Экадом», цяпер узровень забруджвання паветра ў Заводскім раёне ўжо перавышае нарматывы ў паўтара-два разы. Таксама праект парушае патрабаванні да памеру базавых санітарна-ахоўных зонаў, што прадугледжаныя генеральным планам Менску.
На мінулым тыдні МАЗ падпісаў кантракт на экспарт беларускай тэхнікі ў Манагуа – сталіцу Нікарагуа. Адлегласць паміж нашымі краінамі – больш за 10 000 кіламетраў. Эканаміст Алег Мазоль зазначае, што для таго, каб хаця б паспрабаваць атрымаць прыбытак ад продажу тэхнікі ў настолькі аддаленыя краіны, трэба ствараць магутнасці для транспартавання і абслугоўвання. Гэта дадатковыя інвестыцыі на мільёны долараў. Самы ж прыбытковы для беларускага МАЗу пасля расейскага рынку – рынак Украіны – быў страчаны.
«Ніякія пастаўкі ў Нікарагуа ці іншую так званую дружалюбную рэжыму Лукашэнкі краіну не кампенсуюць стратаў украінскага рынку, а з расейскага рынку МАЗ будуць выціскаць пастаўшчыкі аўтатэхнікі з Кітаю. На мой погляд, пастаўкі ў Нікарагуа – гэта не больш чым чарговая нагода для адміністрацыі Лукашэнкі крычаць з кожнага прасу, як яны кожны дзень перамагаюць санкцыйны ціск Захаду», – кажа Алег Мазоль.
Застаюцца пытанні да якасці і бяспекі прадукцыі, што вырабляе МАЗ. Толькі за сёлетні чэрвень вядома пра два выпадкі раптоўнага загарання беларускіх аўтобусаў у Пецярбурзе. Як мінімум шэсць мазаўскіх аўтобусаў гарэлі ў Расеі летась. Адміністрацыя МАЗу тлумачыць знядзеянне машынаў санкцыйным ціскам.
Уладзіслаў Корсак, «Белсат»
