Сталі вядомыя падрабязнасці заходніх санкцыяў супраць афіцыйных Менску і Масквы. Абмежаванні Еўразвязу і ЗША прымеркаваныя да другой гадавіны поўнамаштабнага расейскага ўварвання ва Украіну. Хто з Беларусі патрапіў у абмежавальны спіс?
Глядзіце сюжэт у нашым відэа:
Цяпер афіцыйна. на Захадзе агучылі поўны спіс арганізацыяў і фізічных асобаў, уключаных у 13 пакет санкцыяў Еўразвязу. Частка абмежаванняў тычыцца Беларусі.
Паводле новых звестак, у санкцыйны пакет трапілі генеральны сакратар Беларускага таварыства Чырвонага Крыжа Дзмітрый Шаўцоў, старшыня Наваполацкага гарвыканкама Дзмітрый Дзямідаў, Грамадская арганізацыя «Дэльфіны» і яе кіраўніца Вольга Волкава.
Усе яны прымалі ўдзел у дэпартацыі ўкраінскіх дзяцей з акупаваных тэрыторыяў.
«Менавіта прапановы ўсіх, хто датычныя да ваенных злачынстваў, звязаных з незаконным перамяшчэннем беларускіх дзяцей, былі ўнесены камандай Народнага антыкрызіснага ўпраўлення. Раней пад санкцыі трапіў і дырэктар Беларуськалію Іван Галаваты, які ўзгадваецца ў камунікацыі. У санкцыі таксама трапіў Дзмітрый Мезінцаў – былы амбасадар Расеі ў Беларусі» – кажа Павел Латушка, намеснік кіраўніцы Аб’яднанага пераходнага кабінету Беларусі, кіраўнік НАУ.
У санкцыях асобна адзначылі Аляксея Талая і ягоны фонд. У дакуменце яго назвалі «адной з ключавых асобаў, якія маюць дачыненне да гвалтоўнага вывазу і наступнага незаконнага ўсынаўлення ўкраінскіх дзяцей у Беларусі Расеі». Талая ўключылі і ў санкцыйныя спісы ЗША.
Уведзеныя абмежаванні і супраць ваенна-прамысловага комплексу Беларусі.
Пад санкцыямі апынуліся: сталічнае прадпрыемства «Пеленг», якое вырабляе камплектуючыя для расейскай артылерыі. Аршанскі авіярамонтны завод, што адказвае за рамонт і мадэрнізацыю расейскіх верталётаў і яго кіраўнік Павел Случак.
Барысаўскі 2566-ы завод па рамонце радыёэлектроннага ўзбраення і баранавіцкі 558-мы авіярамонтны завод трапілі пад абмежаванні разам з кіраўнікамі – Валерыям Шацілам і Паўлам Пінігіным.
«Лукашэнка раней таксама знаходзіўся пад санкцыямі, але мы тут ставім больш высокую мэту. Мы намагаемся, каб Лукашэнка атрымаў ордэр на арышт Міжнароднага крымінальнага суда і гэтую дзейнасць мы працягваем» – адзначае Латушка.
Свае санкцыі супраць рэжыму агучыла і Аўстралія. Да ўжо агучаных прадпрыемстваў і асобаў, МЗС гэтай краіны дадало да спісу начальніка Беларускай чыгункі Уладзіміра Марозава і тры беларускія прадпрыемствы: холдынг «Гарызонт», «Волатаўта» і «Планар».
Кацярына Гардзеева, «Белсат»
