Санэпідслужба абмежавала купанне ўжо ў 11 месцах Беларусі. На мінулым тыдні іх было 9. Закрылі некаторыя пляжы ў Салігорскім раёне, у Жлобіне, Магілёве ды іншых рэгіёнах. Але вада пагражае не толькі інфекцыямі. 13 чалавек патанулі ў Беларусі толькі на гэтым тыдні. А з пачатку купальнага сезону – з 1 траўня – колькасць тапельцаў сягнула ўжо 60.
Глядзіце сюжэт у нашым відэа:
«Асноўная прычына няшчасных выпадкаў – гэта купанне ў нецвярозым стане і ў непрыстасаваных, забароненых або стыхійных месцах», – адзначыў памочнік міністра, прэс-сакратар Міністэрства надзвычайных сітуацыяў Беларусі Яўген Бараноўскі.
Вось толькі некалькі прыкладаў:
Афіцыйны прадстаўнік Следчага камітэту Беларусі Аляксандр Сухадольскі нагадаў: дзіця каля вады мусіць быць пад пільнай увагай дарослых.
«Павінны дзеяць прынцып выцягнутай рукі: дзе дзіця – там і вы. Выратавальныя камізэлькі, нарукаўнікі, іншыя прылады не гарантуюць бяспекі. Гарантам бяспекі дзіцяці з’яўляюцца найперш мама і тата, якія знаходзяцца ў непасрэднай блізкасці побач з дзіцем у вадзе і забяспечваюць штосекундны кантроль».
Іншыя правілы бяспекі: абіраць толькі прызначаныя для купання месцы, не заплываць за буйкі, не лезці ў ваду нецвярозаму.
Алкаголь моцна запавольвае рэакцыі арганізму, канстатуе доктар Аляксей Носаў:
«Людзі, якія ўжывалі нават зусім трошкі алкаголю, пачынаюць ныраць. І яны не здолеюць улавіць той момант, калі мозгу не хапае кіслароду. Яны праводзяць крыху больш часу пад вадой і праз гэта гінуць. Яны проста не паспяваюць усплыць, і ў іх проста адключаецца прытомнасць».
Зрэшты, нават і цалкам цвярозы чалавек можа пачаць тапіцца. Калі, напрыклад, нагу скуе сутарга. У гэткім выпадку трэба зрабіць эфектыўнае практыкаванне прафесійных плыўцоў.
«Нацягвайце насок нагі на сябе. Моцна., – параіў Аляксей Носаў. – І выпроствайце каленны сустаў. Гэта дапаможа прынамсі знізіць узровень сутаргі. Некаторыя людзі робяць кароткія ўдары, шчыкаюць сябе або колюць іголкамі. Але гэта ўсё – персанальна».
Доктар Носаў таксама даў парады на выпадак, калі чалавека дасталі з вады ўжо ў непрытомным стане:
І яшчэ. Збіраючыся на пікнік або на пляж, не палянуйцеся паглядзець у інтэрнэце відэаінструкцыю ратавання тапельца. Добра, калі не спатрэбіцца. Выдатна, калі кагось уратуе.
Марына Яновіч, «Белсат».