Цэнтральная выбарчая камісія правярае выбарчыя ўчасткі, бо заўтра ў Беларусі пачынаецца датэрміновае галасаванне на рэферэндуме Лукашэнкі. Беларускі дом друку ў сюжэце ОНТ дэманструе новыя бюлетэні.
Глядзіце сюжэт у нашым відэа:
З чым гэта можа быць звязана? Супольнасць «Сумленныя людзі» разглядае дзве версіі.
«Гэта можа быць перашкодай для аднаго з магчымых сцэнароў, які быў у парадку дня. Людзі абмяркоўвалі выносіць бюлетэні з участку, перашкаджаць такім чынам правядзенню рэферэндуму. Напэўна, зялёны колер больш прыкметны. А другая, напэўна, самая папулярная версія, чаму зялёны колер – для таго каб не толькі людзі, але і чальцы камісіяў не бачылі, ці стаяць там крыжыкі ў двух варыянтах», – кажа лідарка суполкі «Сумлення людзі» Алена Жываглод.
Гаворка пра выпадак, калі падлік бюлетэняў загадаюць ажыццяўляць каляровым бокам дагары. Бо некаторыя чальцы камісіяў у 2020-м паведамлялі незалежным назіральнікам і платформе «Голас» сапраўдную колькасць галасоў за кандыдатаў на пасаду прэзідэнта.
Пытанне ж у бюлетэні будзе адно і толькі на расейскай мове: «Ці прымаеце вы змены і дапаўненні Канстытуцыі Рэспублікі Беларусь?».
А на саміх участках будуць кабінкі без фіранак (нібыта праз антыковідныя абмежаванні), відэаназіранне і ўзмоцненая ахова. Задзейнічаюць і дадатковыя мабільныя групы, цытата, «у поўным экіпаванні».
Казаў на прэс-канферэнцыі ў пятніцу кіраўнік упраўлення аховы правапарадку і прафілактыкі Аляксандр Купчэня. Паводле яго, нібыта за намаганне сарваць рэферэндум завялі 9 крымінальных справаў. Ужо сёння КДБ паведаміў: выкрытыя некалькі груповак, у якія нібыта ўваходзілі ўладальнік фірмы, студэнт-першакурснік і ягоная маці, таксіст, працаўніца банку ды іншыя асобы. Як пазней напісаў праваабарончы цэнтр «Вясна», некаторых з іх ужо затрымлівалі за пратэсты 2010 і 2020 гадоў.
Нягледзячы на ўсё гэта офіс Святланы Ціханоўскай упэўнены: паставіць у бюлетэні два крыжыкі і зрабіць яго несапраўдным – гэта самы бяспечны для беларусаў спосаб выказаць уласную пазіцыю.
«Мы, як і раней, заклікаем людзей прыходзіць на рэферэндум, рабіць гэтыя бюлетэні несапраўднымі, падаваць гэтыя бюлетэні і потым адзначацца ў сістэме “Голас”», – тлумачыць спецыяльны прадстаўнік Святланы Ціханоўскай у пытаннях выбараў.
У спісах для галасавання значацца звыш шасці мільёнаў васьмісот тысячаў беларусаў. Назіраць за працэсам будуць амаль 40 тысячаў унутраных назіральнікаў, звыш сотні – ад СНД і Шанхайскай арганізацыі супрацы. Заходніх назіральнікаў не пусцілі.
«Улады не вельмі моцна замарочваюцца наконт гэтай легітымнасці ў вачах усяго грамадства, а прыхільнікі самога Лукашэнкі прымуць любы варыянт гэтага галасавання», – лічыць палітолаг Валер Карбалевіч.
Рэферэндум абыдзецца Беларусі ў больш як 20 мільёнаў рублёў.
Надзея Бельская, «Белсат»