Аб'ектыў 30.09.2019 2 мільёнам беларусаў не стае на спажывецкі кошык


Амаль 2 мільёны 700 чалавек. Столькі беларусаў не маюць сродкаў на напаўненне гэтак званага спажывецкага кошыку – набору неабходных харчоў, тавараў, паслугаў і плацяжоў, падлічыў Белстат. Гаворка пра грамадзянаў, прыбытак якіх летась у сям’і з 4 чалавек не перавышаў 344 рублі на аднаго.

Ці маюць гэтую суму беларусы цяпер?

«Не, не атрымліваецца. Я медсястра. Заробак – 550 рублёў. Плюс сын. Таму – адкуль?»

– Калі ашчаджаць, то так.

– А калі не ашчаджаць?

– А калі не, то не.

«Хто на што вучыўся. У нас атрымліваецца больш».

«У нас атрымліваецца 340. Але пражыць на гэта… толькі, калі сабе ўва ўсім адмаўляць, толькі хадзіць у краму і забыць увогуле пра ўсё. Пра адзенне і пра ўсё астатняе».

Сітуацыя ж у рэгіёнах выглядае яшчэ горш. Паводле афіцыйнай статыстыкі, сёлета ў жніўні беларусы змаглі набыць менш тавараў, чым летась, у кожным шостым раёне краіны. Штопраўда, аналітык даследчыцкага цэнтру BEROC Леў Львоўскі сітуацыю крытычнай не называе:

«Па-першае, гэта адбылася толькі ў 22-х з больш як 100 нашых раёнаў. Па-другое, гэтае зніжэнне не было надзвычай вялікае. Усё гэта ўкладаецца ў 1-2 адсоткі».

Некалькі дзясяткаў гэтак званых дэпрэсіўных раёнаў – дзе мінімальны набор тавараў у межах спажывецкага бюджэту людзям не па кішэні – у першым квартале сёлета фіксавала таксама Федэрацыя прафсаюзаў. У спісе лідаруюць – Віцебшчына і Магілёўшчына. Нягледзячы на адміністратыўнае падвышэнне сёлета мінімальнага спажывецкага бюджэту.

Леў Львоўскі, Даследчы цэнтр BEROC:

«Варта проста арыентавацца на эканамічны рост і глядзець за тым, каб гэты рост у роўнай ступені адносіўся да ўсіх пластоў насельніцтва. Каб прыбыткі раслі не толькі ў багатых, але і ў бедных, а ўсталёўваць адміністратыўныя лічбы ў цэлым для доўгатэрміновай перспектывы – не гэтак і важна».

Гэтак, паводле падлікаў Белстату, у траўні амаль 2,5 адсоткі беларусаў мелі налічаны заробак меншы за 300 рублёў пры мінімальна гарантаваным дзяржаваю 330 рублёў.

Юлія Лабанава belsat.eu

Глядзі таксама
Каментары