Адзенне, сродкі гігіены, харчы. Рота Браварскога раёну батальёну «Патрыёт». Валанцёры і добраахвотнікі загружаюць гуманітарную дапамогу для аддаленых вёсак Кіеўскай вобласці.
Глядзіце сюжэт у нашым відэа:
Валанцёрка Таццяна кажа:
«У людзей няма сродкаў, каб мыцца, нічога няма. І таму максімальна, што мы робім, мы стараемся давозіць да самых далёкіх вёсак, дзе яшчэ толкам не было нават размініравання».
Асобная пасылка – для дзяцей. Запоўненыя скрынкамі ды мяхамі машыны едуць у Пэрэмогу – паселішча за сорак кіламетраў на ўсход ад Кіева.
Зусім нядаўна Пэрэмогу вызвалілі ад расейскіх захопнікаў. Адыходзячы, вораг замініраваў дарогі, дамы. Да аўтобусаў з дапамогай ужо стаіць чарга, валанцёраў тут вельмі чакаюць.
Кажа жыхарка вёскі Пэрэмога Тамара:
«Мы былі месяц у акупацыі, мы не бачылі хлеба, мы на агні варылі есці, паколькі ў нас няма ні святла, ні газу. А як прыйшлі ўжо нашыя, яны нас не пакінулі ні на адзін дзень».
Іншая жыхарка вёскі дадае:
«Вельмі цяжка было купіць крупы, бо ты стаяў у чэргах па паўтары гадзіны, і калі да цябе даходзіла, табе ўжо не хапала».
Наступны адрас – дзіцячы дом сямейнага тыпу недалёка ад Пэрэмогі. Цяпер тут 9 дзяцей. Ёсць зусім маленькія. Цацкі ды прысмакі для іх – вялікая радасць.
Бацька-выхавальнік Аляксандр дзякуе добраахвотнікам і кажа, што сам было хацеў пайсці абараняць Украіну, ды ў ваенкамаце адправілі дадому:
«Праблемы цяпер як ва ўсіх сем‘яў, праблемы былі з харчамі, з бензінам. Самая вялікая праблема – страх за дзяцей. 759 Такі быў страх… Што рабіць далей?».
На памяць валанцёры распісваюцца на жоўта-сінім сцягу і са словамі падзякі дораць яго дзіцячаму дому.
Камандзір Браварской роты батальёны «Патрыёт» кажа:
«Вельмі прыемна было дапамагчы дзецям, прывезці дзецям ежу, рэчы, падзяліліся трохі грашовым сродкамі».
Праз дарогу – дом састарэлых. Пакеты і скрынкі нясуць сюды. Тут жывуць 16 адзінокіх старых.
Загадчыца аддзялення Ніна распавядае:
«Няма словаў, няма словаў падзякі для гэтых хлопцаў, мы кланяемся перад гэтымі дзецьмі, перад гэтымі хлопцамі. Мы схіляемся перад гэтымі людзьмі. Калі б ні гэтыя хлопцы, у нас было б тое самае, што і ў Быкава, таксама самае, што ў Лук’янаўцы, а так, дзякуй богу, мы жывыя, мы цэлыя».
Неўзабаве пусты гуманітарны канвой вяртаецца ў Кіеў, каб на наступны дзень адвезці дапамогу ў вёску Новае Сяло.
Антон Каменскі, Уладзімір Старыковіч, «Белсат»