Пасля навагодняй ночы беларусаў чакаў непрыемны сюрпрыз – шэраг крамаў гандлёвых сетак «Еўраопт», «Востраў чысціні і смаку», ОМА, «Мацярык» ды заправак «Газпрамнафта», «Беларуснафта» былі зачыненымі ў розных гарадах Беларусі.
Глядзіце сюжэт у нашым відэа:
Гандлёвыя пункты папросту сталіся няздольнымі абслугоўваць пакупнікоў як праз наяўны, так і праз безнаяўны разлік. Прычынаю стаў тэхнічны збой касавага абсталявання.
«Магчыма, збой звязаны з пагаршэннем якасці ІТ-спецыялістаў у Беларусі. Многія беларускія спецыялісты з’ехалі з краіны. Гэта адбілася на якасці працаўнікоў. Многіх звольнілі за грамадзянскую пазіцыю», – падкрэслівае навуковы працоўнік BEROC (Кіеў) Алег Мазоль.
На думку дырэктара ў справах развіцця бізнесу кампаніі «DataTile» Валянціна Сакалоўскага, усё можа быць больш банальным:
«Тусон», з нейкіх невядомых пакуль прычынаў, якія наўрад ці стануць публічнымі, публічна вядомымі. Але гэтая змена даты і прывяла да памылкі».
Дакладных прычынаў у кампаніі «Тусон» – найбуйнейшага вытворцы і пастаўляльніка банкаўскага абсталявання, кліентамі якога акурат і ёсць «Еўраопт», «Востраў чысціні і смаку», ОМА, «Мацярык» і заправачныя кампаніі, пакуль не называюць. Але і не адмаўляюць, што праблема існуе менавіта з праграмным забеспячэннем.
«Мы са свайго боку робім максімальна, што можам зрабіць. Таму, як толькі абсталяванне зробяць, усё запрацуе», – зазначылі «Белсату» ў кампанні.
Наколькі моцна двухдзённы прастой можа адбіцца на гандлёвых сетках, падлічыць цяжка, кажуць адмыслоўцы. Магчыма, вялікіх стратаў атрымаецца пазбегнуць праз невялікую актыўнасць пакупнікоў у паслянавагоднія дні. Але цалкам незаўважна прастой не пройдзе.
«Дакладна будуць пэўныя складанасці з разлікамі ў гандлёвым фінансаванні. Магчыма, кампаніям прыйдзецца браць кароткатэрміновыя крэдыты для забеспячэння разлікаў. Бо ў гэтым выпадку могуць быць штрафныя санкцыі за невыкананне ўмоваў кантракту», – мяркуе Алег Мазоль.
Найбольш пацярпець маглі сеткі крамаў «Востраў чысціні і смаку» ці ОМА, лічыць Валянцін Сакалоўскі.
«У «Вострава чысціні і смаку» амаль усе крамы былі завязаныя на праграмах «Тусону», на фіскальныя апараты, і ў ОМА. На «Еўраопт» і «Беларуснафту» значна менш паўплывала, бо там разнастайнейшы парк сістэмаў касавых», – тлумачыць дырэктар у справах развіцця бізнесу кампаніі «DataTile».
Але якая дакладна колькасць крамаў цяпер зачыненая праз збой, не могуць сказаць ні ў кампаніі «Тусон», ні на гарачай лініі крамаў.
У прыватнасці ў кампаніі «Востраў чысціні і смаку»:
– Ці можна даведацца, якія крамы цяпер працуюць, а якія не, праз збой?
– У нас такой інфармацыі няма, але… Горад Менск у вас?
– Так.
– У Менску, падаецца, усё ўключылі, у рэгіёнах, магчыма, яшчэ…
У адной са сталічных крамаў «Востраў чысціні і смаку» акурат пацвердзілі: абслугоўванне пакупнікоў удалося аднавіць.
– Ці працуе вашая крама?
– Так.
– І гатоўкаю, і праз карту разлічваеце?
– Так.
Калі ж сістэма адновіцца цалкам? Спецыялісты «Тусону» даюць самыя аптымістычныя прагнозы – цягам сённяшняга дня. Міністэрства падаткаў і збораў называе больш песімістычныя тэрміны – дзесяць дзён. А вось наконт таго, хто будзе сплачваць выдаткі ў прастоі, адмыслоўцы сыходзяцца ў адным – толькі не дзяржава.
«Гледзячы якая сетка. Калі сетка кагосьці з набліжаных да Лукашэнкі, то яны знойдуць нейкія механізмы, верагодна, і бюджэтнага фармату, прэферэнцыі, ільготы падатковыя», – рэзюмуе дарадца Асацыяцыі беларускага бізнесу за мяжой Яраслаў Кот.
Спагнаць кампенсацыю могуць і з кампаніі «Тусон», калі прызнаюць цалкам віну за ёю. А могуць адыграцца і на працаўніках, напрыклад, зменшыць прэміяльныя. Або на пакупніках – за кошт цэнаў на тавары, мяркуе дарадца Асацыяцыі беларускага бізнесу за мяжой.
Марыля Дакуцька, «Белсат»
