Відэа, на якім буры мядзведзь становіцца на заднія лапы, знятае каля вёскі Сыч Барысаўскага раёну, дзе некалькі разоў бачылі драпежніка.
«Ну вось гэта рэшткі маіх вуллёў, мне гэты мядзведзь страт зрабіў, я думаў пашырацца, на тысячу долараў я ўляцеў», – паказвае вуллі Уладзімір, жыхар вёскі Сыч.
Мядзведзь разбурае вуллі, забівае хатнюю птушку і псуе маёмасць. Яго бачылі як мінімум у 12 вёсках раёну, практычна ўсюды ён прычыніў шкоду. Але ў лясніцтве небяспечным драпежніка не лічаць.
«А чаму вы думаеце, што ён людзей не будзе чапаць?»
– «А навошта? Мёд ёсць, ён любіць прысмакі. Я кажу: згушчанкі яму купіце, і ён не будзе нікога чапаць», – патлумачылі нам у Забашавіцкім лясніцтве
Жыхары ж вёсак, куды наведваецца драпежнік, напалоханыя.
«Баюся за ўнука, прыехаў. Сама буду хадзіць за ім і пасля 9-й не выпускаць. А паспрабуй утрымай іх летам. Зараз другі прыедзе», – скардзіцца жыхарка вёскі Сыч Ядвіга.
«Страшна падумаць, што будзе, калі яны сустрэнуць гэтага мядзведзя. Дзеці цяпер не пужаныя, бачаць мядзведзя ў заапарку і мульціку. Не дай бог які-небудзь шасцігадовы малы палезе абдымацца», – падтрымлівае Наталля, жыхарка Барысава.
Напрыканцы траўня звер выйшаў да гарадской школы і дзіцячага садка, ён не баіцца ні сабак, ні чалавека.
«Ёсць падстава меркаваць, што ён жыў побач з чалавекам, і таму ў яго адсутнічае пачуццё страху. Насамрэч буры мядзведзь можа ўяўляць небяспеку і ўяўляе. У дадзеным выпадку аптымальны варыянт – гэта знерухоміць яго і вывезці ў дрымучыя лясы», – кажа біёлаг Кацярына Пажытнава з расейскага Цэнтру ўратавання мядзведзяў.
Такі варыянт у сярэдзіне траўня разглядаўся і ў Барысаўскім райвыканкаме, але пакуль што мядзведзя ніхто не злавіў.
«Існуюць праблемы з выратаваннем падобных мядзведзяў. Справа ў тым, што працэс знерухомвання і абсталяванне, неабходнае для гэтага, – дарагія. І не ва ўсіх абсталяванне ёсць у наяўнасці», – тлумачыць біёлаг Кацярына Пажытнава.
Мясцовым прапаноўваюць звяртацца ў міліцыю ці да ратавальнікаў. Прэс-сакратар Міністэрства надзвычайных сітуацыяў Віталь Навіцкі, у сваю чаргу, у неафіцыйным каментары сцвярджае, што ратавальнікі не абавязаныя гэтым займацца.
Мясцовыя звязваюць выхад драпежніка да чалавека з высяканнем лясоў. Біёлаг жа верагоднейшаю прычынаю называе пошук драпежнікамі пажытку.
Алена Дубовік