Каму патрэбна пасварыць Беларусь з Літвой? Ці варта беларусам, якія зазнаюць пераслед у сваёй краіне, уцякаць у Літву? Што рабіць беларусам Літвы: хвалявацца за свой лёс і пакаваць валізкі? Што зрабіць, каб зблізіць літоўцаў з беларусамі?
З пачаткам расейскага ўварвання ва Украіну беларусы ў Літве пачалі ўспрымацца як грамадзяне краіны-суагрэсара. Журналіст Рымас Бружас выступіў з ініцыятываю атакаваць беларусаў, якія наведваюцца ў Літву:
«Літва – гэта не гандлёвы цэнтр, дзе можна атрымаць асалоду ад хараства ды іншых прынадаў заходняга свету. Той, хто прынёс з сабою смярдзючую змяю пагарды да нашага ладу жыцця, каштоўнасцяў і свабоды, павінен адчуць, што яго тут не вітаюць».
Літоўцы баяцца не толькі эканамічных мігрантаў, але і тых беларусаў, якія змагаюцца з рэжымам Лукашэнкі.
«Гэтыя людзі належаць да апазіцыі, але з іншага боку пазіцыянуюць сябе як ліцвіны, якія думаюць, што Літвы як такой не было, што ўсё належала Гудзіі – сучаснай Беларусі. Асноўная мэта – падрыхтавацца да вызвалення Менску са зброяй», – каментуе літоўскі вайсковы аглядальнік Аўрымас Навіс.
На літоўскім тэлеканале прагучала думка, што беларусы ў пэўны момант могуць ператварыць меркаванае вызваленне Беларусі ў інструмент вайны супраць Літвы.
У Дэпартаменце нацыянальнай бяспекі Літвы сцвярджаюць, што цяпер дзейнічае рэкордна вялікая сетка агентаў беларускіх спецслужбаў. Палітыкі прапануюць не выдаваць від на жыхарства новапрыбылым беларусам.
Ці сапраўды беларусы ўяўляюць пагрозу для Літвы? А можа, канфлікт раздуваецца штучна?
Гэтыя ды іншыя пытанні ў «Плане: Б» абмяркоўваюць госці праграмы, сярод якіх – палітолаг і чалец Віленскага раённага самакіравання Вайдас Аўгунас, прадстаўнік Аб’яднанага пераходнага кабінету Беларусі ў замежных справах Валер Кавалеўскі, гісторык і вядоўца праграмы «Вусы Скарыны» на «Белсаце» Цімафей Акудовіч.
Глядзіце ток-шоу «План: Б» на YouTube-канале «Белсат News», у праграме «Belsat Smart» для тэлевізараў с функцыяй«Smart», на мабільных прыладах з сістэмамі iOS и «Android», a таксама ў эфиры «Белсата».
