Хто прэтэндуе на золата, якое здабываюць у Зімбабвэ людзі Лукашэнкі, чаму беларускія добраахвотнікі запрасілі да сябе Зянона Пазняка і чаму Украіна атрымае самалёты, хаця заходнія палітыкі гэтага пакуль не пацвярджаюць?
Даўно ягонаму прылёту ніхто так не радаваўся. Дый сам ён даўно не выглядаў такім шчаслівым. Нарэшце прыніжальныя візіты да Пуціна змяніліся хай сабе і кароткімі, але вельмі прыемнымі вакацыямі ў цёплай Афрыцы. Лукашэнка наведаў Зімбабвэ.
А раней – Аб’яднаныя Арабскія Эміраты. Калі ў арабскай краіне ўсё было звышсакрэтна, то ў Афрыцы ён напоўніцу баляваў разам са світай, малодшым сынам і ягонай маці, Ірынай Абельскай. Чаго там толькі ні было – пудзіла льва, трактары, звярынец, вадаспад Вікторыя. Тры дні посцілі фотаздымкі і відэа. Аднак за ўсім гэтым шумам і святам хаваюцца таемныя бізнес-інтарэсы рэжыму, грошы, а таксама праблемы. Вялікі таварыш Лукашэнкі прэтэндуе на золата, якое менскі самазванец лічыць сваім. Падрабязнасці ў сюжэце Надзеі Бельскай.
Зянон Пазняк і Павел Усаў прыехалі ў Бахмут схіліць галовы перад беларускімі байцамі з палка Каліноўскага. Як цяпер украінцы бачаць Беларусь і яе будучыню пасля вайны? Інтэрв’ю з Паўлам Усавым, палітолагам, прадстаўніком руху «Вольная Беларусь», які цяпер застаецца ва Украіне.
Вялікая інтрыга з пастаўкамі баявых самалётаў Украіне. Заходнія партнёры рыхтуюць пастаўкі цяжкіх танкаў, а каб іх прыкрыць з паветра, патрэбныя самалёты. Прадстаўнік прэзідэнта Украіны Андрэй Ермак апярэдзіў падзеі заяваю, што партнёры гатовыя перадаваць знішчальнікі. У заходніх сталіцах – здзіўленне. Большасць лідараў гэтай заявы цураюцца, прынамсі, пакуль. Не будзе, маўляў F-16 для Кіева, няма пра гэта гутаркі, адзін за адным кажуць Вашынгтон, Варшава і Берлін. А вось Парыж не супраць перадаць свае самалёты. Як гэта разумець, што трэба прачытаць паміж радкоў афіцыйных заяваў? Як перадача самалётаў для Украіны можа змяніць хаду вайны, а галоўнае – калі гэта адбудзецца? Адказы ў сюжэце Вольгі Міцкевіч. Каментуюць Алег Жданаў і Юльюш Сабак.
Ці дапамогуць Рэспубліка Карэя і Японія Украіне перамагчы Расею? NATO і ЗША ўмацоўваюць сувязі са сваімі азіяцкімі саюзнікамі. Мэта – больш рашучая пазіцыя буйных суседзяў Расеі адносна яе антыўкраінскай агрэсіі. Адзін за адным Паўднёвую Карэю наведалі генеральны сакратар NATO Енс Стольтэнбэрг і міністр абароны ЗША Лойд Остын. Стольтэнбэрг адправіўся таксама ў Японію, а амерыканскі палітык – на Філіпіны. Ці даб’юцца Паўночнаатлантычны альянс і ЗША большай дапамогі для Украіны і ці аслабіць Пуціна іхная дыпламатыя ў азіяцкім кірунку – падрабязнасці ў нашым сюжэце.
Эдуард Лобаў, беларускі жаўнер ЗСУ, загінуў за Украіну. Антось Цялежнікаў зняў пра яго кароткі рэпартаж у 2015 годзе, калі хлопец прыехаў абараняць Украіну ад расейскай агрэсіі. Эдуард, нядаўні палітычны вязень рэжыму Лукашэнкі, выбраў шлях добраахвотнай збройнай барацьбы. На старым відэа – хлопец у брытанскай вайсковай уніформе з нашыўкаю «Маладога фронту». Страляць з кулямёта пад Марыупалем яго вучыць іншы вядомы беларускі абаронца Украіны – Аляксей Скобля, пазыўны Тур. Эдуард сказаў тады:
«Украінцы і беларусы – гэта практычна адзін і той жа народ. З падобнай гісторыяй. Адныя і тыя ж праблемы, што ў Беларусі, што ва Украіны. Адзін і той жа вораг».
Ён загінуў на Данбасе, пад Вуглядарам 26 студзеня. Аляксей Скобля – 13 сакавіка, абараняючы Кіеў ад расейскага наступу з боку Беларусі. Вашай увазе кароткі рэпартаж пра іх, зняты ў 2015 годзе.
Міжнародны тэлечасопіс «ПраСвет» з Сяргеем Пелясою глядзіце шточацвер а 21:30. Падпісвайцеся на «Прасвет» у профілю на Facebook ! Глядзіце нас праз спадарожнік «Астра 4A» (ранейшая назва «Sirius 4»), онлайн, на YouTube-канале і на нашай старонцы.