Моцна пацяжэлыя «жыроўкі» называлі і скандалам, і тэхнічнаю памылкай, і нават гэтак:
«Ад балды! Значыць, тут павінен быць спіс, хто гэту балду прыдумаў», – абурана вымавіў новы крылаты выраз Аляксандр Лукашэнка.
Хто ж гэтую балду прыдумаў – дасюль не агучылі. Але стала вядома пра вызваленне з пасады намесніка міністра ЖКГ Анатоля Шагуна. Высокага чыноўніка звольнілі ў сувязі з «здзяйсненнем учынку, не сумяшчальным са знаходжаннем на дзяржаўнай службе». Што менавіта зрабіў Шагун, і ці звязана гэта з павышэннем тарыфаў ЖКГ – не тлумачаць.
«Знайшлі ахвярнага казла для таго, каб паказаць нашаму кіраўніцтву дзейнасць кантрольных органаў або сілавых структураў. Звольнілі з цалкам незразумелай пазіцыяй», – мяркуе Рыгор Кастусёў, былы дырэктар Шклоўскага абʼяднання ЖКГ.
І невядома, што, уласна, з пакараннем. Аляксандр Лукашэнка ў лютым загадаў кіраўніку Дзяржкантролю надзець кайданкі – цытата – «дзясятку-другому» вінаватых у павышэнні тарыфаў. Тады гэта зразумелі даслоўна: дэпартамент фінансавага расследавання Камітэту дзяржаўнага кантролю распачаў 13 крымінальных справаў у дачыненні пасадоўцаў ЖКГ.
- «Працаваць у ЖКГ на кіроўныя пасады ідуць не дзеля заробкаў»
- ЖКГ – відовішчы без хлебу
- Захад прагне суду над Лукашэнкам за тарыфы ЖКГ
- Былы кіраўнік ЖКГ Менску: з жыроўкамі будзе толькі горш
- Тарыфы ЖКГ па палічках. Эканамісты пра будучыню жыровак
Пад канец лютага, паводле дзяржаўных медыяў, крымінальных справаў было ажно 22. А ў траўні Следчы камітэт рапартаваў пра заканчэнне расследавання ў дачыненні шасці высокіх ураднікаў. Сярод іх быў і намеснік міністра ЖКГ. Ягонага імя не назвалі, але абвінавацілі.
«Арганізаваў складанне і падпісанне заведама фальшывых дакументаў аб выкананні дзяржпраграмы. Гэта дазволіла схаваць факты невыканання працаў і неабходнасць вяртання грашовых сродкаў, выкарыстаных з парушэннем заканадаўства», – рапартаваў Следчы камітэт.
Калі ж вінаватых знайшлі, а тарыфы пералічылі, то ці палепшылася нешта ў ЖКГ? Апытаныя намі менчукі не задаволеныя ані коштамі, ані якасцю паслугаў.
«Як было, гэтак і засталося. Напрыклад, выклікаеш таго ж сантэхніка – ён кажа, што нічога не можа зрабіць», – кажа жанчына.
«Кошты на ЖКГ высокія. І растуць, на жаль. Людзі вельмі незадаволеныя», – абураецца жыхарка Менску.
Былы кандыдат на прэзідэнта і адмысловец у сферы ЖКГ Рыгор Кастусёў кажа, што крымінальныя справы можна заводзіць у любым раёне ды любой вобласці, але наўрад ці ўлады хочуць псаваць уражанне.
«Тым больш напярэдадні Ўсебеларускага народнага сходу. Перад гэтым сходам сказаць, што ў міністэрства або іншых установах жыллёва-камунальнай гаспадарцы выяўленыя карупцыйныя складнікі – гэта трошкі падмачыць рэпутацыю беларускіх уладаў», – упэўнены Рыгор Кастусёў.
Сёння ж зʼявілася новая праграма сацыяльна-эканамічнага развіцця. Паводле яе павышэнне тарыфаў на камунальныя паслугі будзе адбывацца з улікам росту заробкаў і паніжэннем выдаткаў на аказанне паслугаў.
Ганна Любакова, «Белсат», фота – sputnik.by
