Кампанія «Канкорд», якая належыць расейскаму бізнесоўцу Яўгенію Прыгожыну, апублікавала адказ на просьбу выказацца аб вярбоўцы на вайну ва Украіне зняволеных і выпраўку іх у складзе ПВК «Вагнера».
Бізнесовец Яўгеній Прыгожын, якога называюць «кухарам Пуціна» і кіраўніком прыватнай арміі, вядомай пад назвай ПВК «Вагнера», ужо даўно не ўтойвае сваёй сувязі з наймітамі, хоць расейскае заканадаўства фармальна прадугледжвае за гэта пазбаўленне волі на тэрмін ад 12 да 18 гадоў (арт. 359 КК РФ). Паведамлялася, што ён асабіста ездзіў у калонію агітаваць зняволеных на вайну.
Але Прыгожын іранізуе: наймітаў «Вагнера», кажа ён, «там няма», але яны «цудоўна ваююць», і гэта кажа «чалавек, падобны да Прыгожына». Сваіх наймітаў ён апісвае так: «не самыя выбітныя асобы, але і не скончаныя *** [ёлупні]». Пра зняволеных, якія пайшлі ваяваць, ён тлумачыць:
«Безумоўна, калі б я быў зняволеным, я б марыў уліцца ў гэты дружны калектыў [ПВК «Вагнера»], каб мець магчымасць не толькі выканаць доўг перад Радзімай, але і аддаць яго з лішкам».
Тым, каму не падабаецца, што зняволеныя ваююць ва Украіне, ён сказаў: «Сваіх дзяцей на фронт адпраўце».
«Альбо ПВК і зэкі, альбо вашыя дзеці – вырашайце самі», – рэзюмаваў Прыгожын.
Як паведамлялі з расейскай калоніі зняволеныя, вязням, якія запісаліся ў ПВК, паабяцалі не толькі свабоду праз паўгода службы, але і магчымасць зноў ваяваць, калі яны зноў трапяць за краты. Ім таксама абяцаюць каля 200–250 тысячаў расейскіх рублёў за месяц (3300-4200 долараў). Але за правіны абяцалі смяротнае пакаранне.
Алесь Наваборскі belsat.eu