Палітзняволенага мастака Алеся Пушкіна, а разам з ім яшчэ 9 сяброў некалькі тыдня таму выключылі з Беларускага саюзу мастакоў па рашэнні рады арганізацыі. Прычыны называліся розныя, але сапраўдныя – нелаяльнасць да ўладаў і апазіцыйныя погляды, піша «Наша Ніва» са спасылкай на свае крыніцы.
Алесь Пушкін пра сваё выключэнне, найхутчэй, так і не даведаўся: лісты да палітвязня ў гарадзенскую турму апошнім часам практычна не даходзілі, і зваротнай сувязі з ім не было цягам больш як двух месяцаў.
Разам з Алесем Пушкіным з Саюзу мастакоў быў выключаны таксама дызайнер Уладзімір Цэслер.
Алесь Пушкін быў асуджаны ў сакавіку 2022 года да 5 гадоў пазбаўлення волі. Адбываў пакаранне ў калоніі ў Івацэвічах, але потым за сістэматычныя парушэнні яму змянілі рэжым утрымання і на паўтара года накіравалі ў турму №1 у Горадні.
11 ліпеня стала вядома, што Алесь Пушкін памёр у гарадзенскай лякарні. Яго прывезлі з турмы ў непрытомным стане з прабадной язвай. Падчас аперацыі ў мастака спынілася сэрца.
13 ліпеня Пушкіна пахавалі на ягонай малой радзіме – у вёсцы Бобр Крупскага раёну.
Марыя Міхалевіч belsat.eu