Паўночная Карэя 4 кастрычніка зноў увайшла ў сусветныя навіны з агрэсіўнымі дзеяннямі ў дачыненні суседніх краінаў і не толькі.
Гэтак, кіраўнік дэпартаменту МЗС КНДР у справах міжнародных арганізацыяў Чо Чхоль Су падтрымаў анексію Расеяй Данецкай, Запарожскай, Луганскай і Херсонскай вобласцяў Украіны. Пры гэтым палова заявы паўночнакарэйскага МЗС прысвечаная крытыцы ды пагрозам ЗША і Радзе бяспекі ААН.
Больш за тое, КНДР запусціла балістычную ракету над тэрыторыяй Японіі. Ракета, выпушчаная раніцай аўторка, пераадолела 4,6 тысячы кіламетраў – гэта максімальная адлегласць за ўвесь час правядзення Пхеньянам ракетных выпрабаванняў. Праляцеўшы над Японіяй, ракета ўпала ў Ціхім акіяне.
У Японіі мяркуюць, што КНДР запусціла балістычную ракету тыпу «Hwasong-12», першы паспяховы запуск якой адбыўся ў 2017 годзе. Сёлета гэта ўжо 23-е ракетнае выпрабаванне КНДР з пачатку года.
З прычыны запуску ў Японіі спрацавала экстраная сістэма апавяшчэння. А Токіа выказаў рашучы пратэст Пхеньяну праз дыпламатычныя каналы ў Пекіне, падкрэсліўшы, што такія дзеянні паўночнакарэйскага боку парушаюць рэзалюцыі Рады бяспекі ААН і пагражаюць бяспецы Японіі ды ўсяго рэгіёну.
У Камітэце начальнікаў штабоў УС Рэспублікі Карэя папярэдзілі, што «правакацыі з пускам балістычных ракетаў» выклічуць мацнейшы адказ з боку хаўрусу ЗША і Рэспублікі Карэя ды ўмацаванне іх супольнага патэнцыялу рэагавання.
Якуб Хруст belsat.eu