Агітацыйныя пікеты за кандыдатку ў прэзідэнты Беларусі Святлану Ціханоўскую праходзяць не толькі ў тых гарадах, дзе яны прыязджае сама.
Гэтак, 26 ліпеня агітацыйны пікет за кандыдатку ў Лёзне правяла ейная давераная асоба Таццяна Севярынец з Беларускай хрысціянскай дэмакратыі.
Актывістка распавяла, што з’яўляецца радыкальнай апазіцыянеркай і чакае пераменаў, таму і стала побач са Святланай Ціханоўскай.
Яна таксама распавяла пра онлайн-платформу «Голас», якая павінна дапамагчы абараніць выбар беларусаў і паказаць вынікі, якія падлічаць не камісіі, а самыя выбарнікі.
«Ліда [старшыня ЦВК Лідзія Ярмошына. – Рэд. Belsat.eu] не бачыць будучыні без Лукашэнкі, а я не бачу будучыню з Лукашэнкам», – заявіла Севярынец.
Прысутныя адзначылі, што ніводны голас лёзненцаў не залічылі ў падтрымку Ціханоўскай.
Агулам у сустрэчы ўдзельнічаюць каля 100 чалавек. Шмат хто прыйшоў з дзецьмі і ўнукамі.
Адзін мужчына выйшаў да мікрафону з натоўпу і заявіў, што падчас галасавання трэба не проста фатаграфаваць бюлетэнь, а сфатаграфаваць з прывязкай да мясцовасці.
«Я два разы галасаваў за Лукашэнку – больш не галасаваў. Зараз ён павінен сысці, каб не было крыві», – заявіў выступовец.
Ён таксама папярэдзіў, што 9 жніўня могуць быць правакацыі.
МГ belsat.eu