Выхад на адзіны курс быў непазбежны, але ўлады Беларусі выбралі для гэтага самы доўгі, самы цяжкі, самы балючы шлях. Выхад на адзіны курс адбыўся ў самы неспрыяльны для краіны момант. Такі пункт гледжання выказаў кіраўнік Асацыяцыі малога і сярэдняга прадпрымальніцтва Сяргей Балыкін.
«Толькі пачаўся ацяпляльны сезон, таму вельмі вялікую ролю адыгрываюць тарыфы на жыллёва-камунальныя паслугі. А на асноўнай сесіі валюта набывалася якраз для аплаты энерганосьбітаў. Курс долара вырас, таму адпаведна падаражэюць энерганосьбіты, падаражэе газ, як вынік – падаражэюць ацяпленне, харчовыя прадукты, падаражэе практычна ўсё», – зазначыў Балыкін.
На ягоную думку, курс валюты – гэта індыкатар працэсаў, што адбываюцца ў эканоміцы дзяржавы. «Ён гэтак жа, як тэмпература чалавека, паказнік нейкіх працэсаў, што адбываюцца ў яго арганізме. Нельга прагназаваць, якая будзе тэмпература, але, аналізуючы тэмпературу, мы можам сказаць, якія працэсы адбываюцца ў арганізме. На жаль, улады Беларусі спрабуюць змагацца не з хваробаю, а з сімптомамі. Яны збіваюць гэтую тэмпературу, заганяючы хваробу ўнутр», – рэзюмаваў эксперт.
belsat.eu
