У Менску 28 лістапада суд прызначыў трэці запар адміністрацыйны арышт для праваабаронцы Насты Лойкі. Аб гэтым паведамляе тэлеграм-канал беларускай каманды праваабарончай арганізацыі «Human Constanta».
Разгляд адміністрацыйнай справы праваабаронцы Насты Лойкі адбыўся ў панядзелак 28 лістапада ў судзе Першамайскага раёна Менску. Па выніках суда Лойцы прызначылі чарговыя 15 сутак адміністрацыйнага арышту па артыкуле 19.1 (Дробнае хуліганства).
На мінулым судзе Наста распавядала пра катаванні — супрацоўнік ГУБАЗіК ударыў яе электрашокерам, а адзін з супрацоўнікаў ЦІП вывеў яе ва ўнутраны двор і пакінуў без вопраткі на 8 гадзін, пасля чаго дзяўчына захварэла.
Нагадаем, Насту затрымалі 28 кастрычніка. У той жа дзень на праўладных тэлеграм-каналах зʼявілася «пакаяльнае відэа», на якім яна «прызнавалася» у тым, што нібыта «атрымоўвала фінансаванне ад замежных арганізацый». Пазней Лойцы двойчы прысудзілі 15 сутак арышту за «дробнае хуліганства» (арт. 19.1 КаАП).
За апошнія тры месяцы Насту затрымлівалі і каралі адміністрацыйным арыштам некалькі разоў, але яна не збіралася з’язджаць з Беларусі.
Антон Тачняк belsat.eu
