Сілавікі зладзілі аблавы на вулічных музыкаў у Менску ўвечары 18 жніўня. На вуліцы Зыбіцкай АМАП затрымаў адразу некалькі музычных гуртоў, паведамляе «Zerkalo» са спасылкай на відавочца.
Забралі музыкаў адразу трох розных гуртоў – іх затрымалі без папярэджання і адвезлі ў РУУС. Ніякіх песень «пра палітыку» яны не выконвалі, паведаміў відавочца. Адзін з калектываў – кавер-гурт «Best Sound Band», які граў на вуліцы са сваёй апаратурай.
Яшчэ ў верасні 2020 года музыкаў гурта «Best Sound Band» затрымлівала міліцыя за песню «Разбуры турмы муры» у пераходзе на плошчы Якуба Коласа ў Менску. Тады іх пакаралі адміністрацыйным арыштам паводле артыкула 23.34 КаАП («Парушэнне парадку арганізацыі ці правядзення масавых мерапрыемстваў») нібыта за ўдзел у мітынгу каля філармоніі. Музыкам прысудзілі па 12 і 13 содняў арышту.
Алена Рувіна belsat.eu