У ноч з 16 на 17 снежня Расея зладзіла чарговую паветраную атаку на Украіну, у выніку якой пацярпелі мірныя жыхары. ЗСУ ў сваю чаргу атакавалі дронамі вайсковы аэрадром у Растоўскай вобласці.
Як сцвярджаюць Паветраныя сілы ЗСУ, атаку агрэсара атрымалася адбіць. Усе 20 дронаў-камікадзэ «Shahed», якія запускалі з мысу Чаўда (Крым) і Прыморска-Ахтарску, былі знішчаны сіламі супрацьпаветранай абароны. Таксама былі знішчана расейская кіраваная авіяцыйная ракета Х-59.
Акрамя таго, паводле ЗСУ, па тэрыторыі Украіны была запушчана крылатая ракета «Іскандер-К», але яна не дасягнула сваёй цэлі.
Не абыйшлося без ахвяраў. Кіраўнік Адэскай абласной вайсковай адміністрацыі Алег Кіпэр паведамляе, што над тэрыторыяй вобласці былі знішчаны 9 дронаў-камікадзэ, але адзін са збітых беспілотнікаў упаў на жылы квартал ў Адэскім раёне і выбухнуў.
«Адбылося знішчэнне з наступным узгараннем жылых прыватных дамоў і складскіх памяшканняў прыватнай спартовай установы. Пажарныя аператыўна ліквідавалі пажар. У адным з дамоў знойдзены мёртвы чалавек», – напісаў Кіпер у сваім Telegram-канале.
Украіна ў ноч на 17 снежня атакавала расейскі вайсковы аэрадром у Растоўскай вобласці. Як паведамляе выданне «Astra», украінскія беспілотнікі спрабавалі атакаваць вайсковы аэрадром у Марозаўску, дзе базуецца 559 гвардзейскі бамбардзіровачны гвардзейскі полк (в/ч 75392). Як удакладняе расейскае выданне, там дыслакаваны франтавыя бамбавікі Су-24, Су-24М, Су-34. Вынікі атакі пакуль невядомыя.
У Мінабароны РФ сцвярджаюць, што ўвогуле ноччу расейскія сілы супрацьпаветранай абароны збілі 33 беспілотніка, іх перахапілі над тэрыторыяй Ліпецкай, Растоўскай і Валгаградскай абласцей.
Пазней у міністэрстве паведамілі пра знішчэнне яшчэ двух дронаў у Валгаградскай вобласці.
Глеб Нержын belsat.eu
