Выведка Злучаных Штатаў даведалася аб тым, што ў Кітаі адхілілі ад пасады міністра абароны Лі Шан Фу і вядуць расследаванне супраць яго, сцвярджае «Financial Times» і спасылаецца на трох амерыканскіх чыноўнікаў і двух чалавек, знаёмых са звесткамі выведкі.
Паводле «Financial Times», у кітайскіх вайсковых і вонкавапалітычных элітах відаць хаос: з пачатку лета пасадаў пазбавіліся міністр замежных справаў Цінь Ган, два вышэйшыя камандзіры ядравых сілаў, якіх западозрылі ва ўцечцы сакрэтных звестак, а цяпер і міністр абароны Лі Шан Фу.
Афіцыйных паведамленняў аб затрыманні або звальненні Лі Шан Фу няма. Але ён некалькі тыдняў не з’яўляўся на публіцы, нібыта «па стане здароўя» прапусціў перамовы з вайскоўцамі В’етнаму 7-8 верасня.
Амбасадар ЗША ў Японіі Рам Эмэньюэл выказваў здагадку, што Лі Шан Фу не проста так знік на тры тыдні, а можа быць пад хатнім арыштам. Эмануэл ці то ў жарт, ці то сур’ёзна дадаў, што Лі Шан Фу, як яму вядома, выплаціў свой крэдыт аператару нерухомасці «Country Garden» (які трапіў у вялікі крызіс).
Незадоўга да знікнення Лі Шан Фу ладзіў візіты ў Расею і Беларусь, сустракаўся ў тым ліку з Аляксандрам Лукашэнкам. Канкрэтныя вынікі візітаў не паведамляліся, але між Беларуссю і Кітаем і без таго трывае цесная вайсковая супраца. Паездка ў Беларусь была апошнім ці адным з апошніх замежных візітаў міністра, а апошні раз яго бачылі на публіцы 29 жніўня падчас пекінскага форуму аб міры і бяспецы ў Афрыцы.
Алесь Наваборскі belsat.eu