«Мы зможам прывезці Беларусь дадому». Музыка Сяргей Доўгушаў пра ЗША, новы альбом і цяслярства
Сяргей Доўгушаў – адзін з самых вядомых адмыслоўцаў у галіне беларускай народнай музыкі. Ягоны гурт «Vuraj» і праект «Спеўны сход» быў добра вядомы менчукам. Музыка актыўна ўдзельнічаў у дваровых канцэртах пасля жніўня-2020, але праз ціск быў вымушаны з’ехаць з краіны. Цяпер ён часова жыве ў ЗША і засвойвае новыя прафесіі. Сяргей паспеў арганізаваць шэраг дабрачынных канцэртаў для дапамогі ўкраінцам, запісаць музычны альбом і заняўся цяслярствам. Мы даведаліся, чым жыве лідар гурта «Vuraj» у Амерыцы.
Сяргей Доўгушаў кажа, што пасля вымушанага ад’езду спачатку перабраўся з сям’ёй у Варшаву, дзе актыўна ўдзельнічаў у культурніцкім жыцці і нават далучыўся да стварэння незалежнага аркестру. Пасля здабыцця Green Card ягоная сям’я вырашыла перабрацца ў Штаты. Нейкі час спадар Доўгушаў жыў у Чыкага, але нядаўна пераехаў у Мінэапаліс, штат Мінэсота. Аднак ён вельмі хоча вярнуцца ў Беларусь і спадзяецца, што ЗША не будзе фінальным пунктам у ягонай біяграфіі.
Музыка і цясляр
Літаральна за некалькі месяцаў у Амерыцы музыка паспеў наведаць 9 розных штатаў і трошкі пазнаёміцца з разнастайнай мясцовай культурай.
«Так апошнім часам я спрабую ўвайсці ў новы для сябе свет. Я ўжо паспеў пабываць у дзевяці розных штатах, наведаць амерыканскае вяселле і пабачыў, што ў ЗША развітая культура сумесных сняданкаў», – кажа Сяргей Доўгушаў.
У Амерыцы Сяргей Доўгушаў вырашыў на нейкі час змяніць свой прафесійны від дзейнасці. Цяпер ён займаецца працай з драўнінай і зборам якаснай мэблі ў горадзе Мінэапаліс. Сяргей кажа, што разнастайная праца і заняткі з дрэвам дапамагаюць яму даць рады з жыццёвымі цяжкасцямі і стрэсам. Яму падабаецца працаваць з дрэвам, і ў перспектыве ён хацеў бы вырабляць драўляныя музычныя інструменты.
«Чаму займаюся дрэвам і мэбляй? Так супала. Я пераехаў у Мінэапаліс і шукаў варыянты для працы. Спыніўся на мэблі. Параіўся з маім коўчам, які сказаў, што мне б зайшла праца, дзе працуе галава і цела», – распавядае спадар Доўгушаў.
Музыка кажа, што насамрэч любіць новыя заняткі. Ён згадвае, што калісьці ўдома спрабаваў рабіць цікавыя палічкі і думаў пра тое, што гэта будзе карысна для сям’і. Сяргей кажа, што фірма, у якой ён працуе, не нагадвае «ІКЕА», але займаецца вырабамі з добрай драўніны, і часта праекты выглядаюць даволі творчымі.
«Я нават пацікавіўся, ці ёсць такія станкі, каб рабіць дудкі нашыя, але пакуль належныя яшчэ не знайшоў. Мой дзядуля таксама займаўся дрэвам і вырабляў нашыя дудачкі, таму буду спрабаваць знайсці належныя прыстасаванні і спадзяюся, што з часам апроч мэблі змагу і драўляныя музычныя інструменты майстраваць», – кажа Доўгушаў.
З пачатку жыцця ў ЗША Сяргей прыкмеціў, што гэтая краіна вельмі адкрытая для людзей, якія гатовыя працаваць і зарабляць. А тыя, хто хоча больш зарабляць, маюць больш працаваць. Гэтым Штаты адрозніваюцца ад Беларусі, дзе творчая прафесія не можа гарантаваць чалавеку забяспечанасці.
Плануе купальскія святкаванні для дыяспары
Паводле Доўгушава, засваенне новай цяслярскай прафесіі на азначае разрыву з творчасцю. Ён кажа, што ўжо паспеў з канцэртамі аб’ездзіць дзевяць гарадоў у дзевяці розных штатах, і яшчэ плануе наведаць Канаду. Таксама творца адзначае, што выступы там можна планаваць толькі на суботу і нядзелю, ды часам на пятніцу, бо з прычыны складанага графіку людзі фактычна не могуць выбрацца на імпрэзы з панядзелка да чацвярга. Адпаведна, для канцэртаў і выступаў прыходзіцца падладжвацца пад агульны расклад.
«Таксама захапляюся, якая тут актыўная нашая дыяспара. Спадзяюся, што неўзабаве зможам правесці купальскія святкаванні для беларусаў. А ў планах маем нават адкрыццё культурніцкага цэнтру, дзе можна будзе ладзіць танцы, музычныя вечары і падтрымліваць нашае культурніцкае жыццё», – дзеліцца Сяргей Доўгушаў.
Напярэдадні вайны запісаў альбом з музыкамі з Амерыкі і Украіны
«Маё перабыванне ў ЗША нагадвае кіно. Такія гісторыі тут. Едзеш па горадзе, па вуліцах, па хайвэі і згадваеш розныя стужкі. У 2018 годзе я прыехаў у Атэнз, штат Агаё, дзе быў канцэрт, і мая музыка з народнымі спевамі вельмі спадабаліся амерыканцам. З некаторымі мясцовымі музыкамі мы пачалі джэміцца. Так пасябравалі і вырашылі стварыць праект «Slavalachia» – спалучыўшы «славян» і назву аднаго з індзейскіх плямёнаў», – кажа музыка.
Што цікава, альбом быў запісаны ва Украіне. Музыкі адмыслова сабраліся ў Тэрнопалі, дзе ведалі добрую студыю і мелі знаёмствы з мясцовымі музыкамі. Агулам у канцы лета-2021 і пачатку восені было запісана 20 кампазіцыяў. Тады творцы яшчэ не маглі ўявіць, што неўзабаве пачнецца вайна, і яны не хутка змогуць вярнуцца ў гэты горад.
Доўгушаў адзначае, што альбом добра пацэліў у сучасны настрой. Шмат спеваў на ім якраз прысвечаныя вайне і болю.
«Мы, вядома, не маглі падумаць, што так актуальна атрымаецца. Тым болей, што ён такі сяброўскі выйшаў, з удзелам амерыканцаў, украінцаў і беларусаў», – кажа Доўгушаў.
Альбом можна паслухаць на «Spotify» і адмысловым сайце.
Музыка змог забраць з Беларусі амаль усе свае інструменты і здолеў арганізаваць невялікі дабрачынны тур у падтрымку Украіны. Цяпер, нягледзячы на занятасць цяслярскай працай, творца разлічвае на іншыя калабарацыі і праекты.
З якімі эмоцыямі адчувае і перажывае вайну
Доўгушаў адзначае, што людзі ў Амерыцы вельмі спачувальна ставяцца да таго, што адбываецца цяпер ва Усходняй Еўропе. Сяргея ж ваенныя навіны проста выбілі з каляіны.
«Вядома, першыя тыдні вайны былі надта цяжкія, але пасля я пачаў уключацца. Я пабачыў, што беларусы ладзяць столькі ініцыятываў! Валанцёраць, збіраюць дапамогу, і адметна тое, што яны пра гэта амаль не пішуць. Збіраюць добрыя сумы дапамогі, але не крычаць пра гэта навокал, бо гэта нармальна – дапамагаць», – кажа музыка.
Так пачаліся дабрачынныя канцэрты, на якіх збіралі грошы для Украіны. Імпрэзы прайшлі ажно ў дзевяці штатах, агулам атрымалася сабраць звыш 22 000 долараў. Застаўся запланаваным яшчэ канцэрт у Канадзе.
Што бы параіў маладым мігрантам?
«Першае, што варта ведаць, паўсюль ёсць свае, і гэта вельмі адчуваецца. Я прыязджаю ў новы горад і ведаю, што там могуць дапамагчы нават з працай. Не варта жыць, вядома, з разлікам на пастаянную дапамогу. Але трэба шукаць і знаходзіць сваіх заўжды, не губляцца і быць карысным. Развівацца і не стаяць на месцы, не губляць часу і магчымасцяў, не губляць сябе», – кажа Доўгушаў.
Таксама музыка кажа, што жыццё за мяжой не лёгкае, а часам прыносіць і расчараванні.
«Я разумею, што можа стацца так, што я не змагу вернуцца ў Беларусь. Але жыццё не канчаецца на гэтым. Нашыя музыкі ўсе раскіданыя, але мы павінны збірацца там, дзе ёсць. Напрыклад, шмат чаго робяць беларусы ў Варшаве, дзе існуе незалежны аркестр, які я калісьці стварыў. Гэта стварае Беларусь там, дзе яна ёсць. І гэта потым мы можам прывезці дадому. Нельга губляць час», – кажа Доўгушаў.
Музыка падзяліўся перажываннямі аб тым, што цяпер адбываецца ў Беларусі. Асабліва Доўгушаў пераймаецца за тых, хто застаецца ў турмах. Творца піша лісты, хоць не ўпэўнены, што прыйдзе адказ. Ён адзначае: шмат каго з сяброў трымаюць за кратамі, хочацца дапамагчы ім, калі яны выйдуць на свабоду.
Паслухаць альбом можна тут.
ЗХ belsat.eu
