Аляксандр Лукашэнка 10 красавіка падпісаў указ № 98 «Аб развіцці сродкаў масавай інфармацыі». У ім пералічваюцца дзяржаўныя медыі, якія атрымаюць дадатковае фінансаванне ад абавязковых адлічэнняў рэкламадаўцаў.
Раней пад гэта быў уведзены збор памерам 10 % пры размяшчэнні вонкавай рэкламы і рэкламы на транспарце, а ў іншых выпадках – 20 % ад кошту паслуг на распаўсюд рэкламы. Збор аплачваецца рэкламадаўцамі і накіроўваецца на падтрыманне дзяржаўных медыяў.
Сабраныя сродкі пойдуць на падтрыманне ў выглядзе «субсідыяў» выключна юрыдычным асобам, на якія ўскладзеныя функцыі рэдакцыяў СМІ і якія ёсць дзяржаўнымі арганізацыямі, дзеля кампенсацыі расходаў на вытворчасць нацыянальнага кантэнту. Вось хто атрымае дапамогу:
- Нацыянальная дзяржаўная тэлерадыёкампанія: набыццё абсталявання, праграмнага забеспячэння, а таксама тэхнічная мадэрнізацыя вытворчых фондаў;
- БелТА: функцыянаванне і эксплуатацыя мультымедыйнага інтэрнэт-рэсурсу для распаўсюду прадукцыі СМІ;
- прадпрыемства «Дом прэсы»: стварэнне і функцыянаванне аўтаматызаванай сістэмы маніторынгу тэле- і радыёпраграмаў, якія распаўсюджваюцца на тэрыторыі Беларусі;
- Белдзяржуніверсітэт: абсталяванне, якое выкарыстоўваецца ў тэлевізійным працэсе на факультэце журналістыкі.
Размяркоўваць бюджэтныя сродкі будзе Міністэрства інфармацыі, а памер субсідыяў вызначыць адмысловая камісія, прыпісаная да ведамства. Адсочванне законнасці выканання ўказу ўскладзена на Камітэт дзяржаўнага кантролю.
Алена Рувіна belsat.eu
