У ноч на 6 ліпеня расейскія войскі нанеслі ракетныя ўдары па Львове, у выніку якіх загінулі 10 чалавек, паведамляе мэр гораду. Цела аднаго чалавека знайшлі ўначы, а яшчэ аднаго – сёння раніцай.
«Львоў. Колькасць загінулых у выніку расейскіх ракетных абстрэлаў узрасла да 9 чалавек, 42 асобы атрымалі раненні», – паведамляе МУС Украіны.
Пазней пад заваламі было знойдзенае цела жанчыны, 10-й загінулай асобы, паведаміў мэр Львова Андрэй Садавы. Пасля знаходжання цела пошукава-выратавальныя работы на месцы трапляння ракетаў прыпыненыя. Таксама Садавы заявіў, што гэта «найбуйнейшая атака на грамадзянскую інфраструктуру Львова з пачатку поўнамаштабнага ўварвання».
Сярод пацярпелых трое дзяцей.
У Генштабе ЗСУ дадалі, што па Львове 6 ліпеня ўдарылі тры расейскія ракеты «Калібр». Пашкоджаныя і разбураныя больш за 35 дамоў, больш за 250 кватэраў, 10 інтэрнатаў, дом дзіцяці, дзве вышэйшыя навучальныя ўстановы і іншая цывільная інфраструктура.
Украінскім сілам СПА ўдалося знішчыць сем з дзесяці «Калібраў», астатнія тры трапілі ў цывільныя аб’екты ў Львове, гаворыцца ў паведамленні камандавання.
Алена Рувіна belsat.eu