Кароль Вялікай Брытаніі Карл III адправіцца ў першае замежнае падарожжа ў якасці манарха. Спачатку наведае Францыю, потым – Германію. Аналітыкі ўгледжваць у гэтым сігнал гатоўнасці паляпшаць адносіны паміж Лонданам, Парыжам і Берлінам, што пасля Brexit не проста. Аб гэтым паведамляе AP са спасылкай на Бакінгэмскі палац.
Першы манаршы візіт караля Вялікай Брытаніі Карла III запланаваны з 26 па 31 сакавіка. Паведамляецца, што візіт будзе здзейснены ў Францыю і Германію, найвялікшыя краіны ЕЗ. Гэта адлюстроўвае намаганні Абʼяднага каралеўства навесці масты са сваімі еўрапейскімі суседзямі пасля гадоў напружаных адносін, выкліканых Brexit.
Кароль Карл III і каралева-кансорт Каміла сустрэнуцца з прэзідэнтам Францыі Эмануюлем Макронам і затым прэзідэнтам Германіі Франкам-Вальтэрам Штайнмаерам. У Бакінгэмскім палацы падкрэсліваюць, што візіт павінен адзначыць адносіны Вялікай Брытаніі з Францыяй і Германіяй, адзначыць агульную гісторыю, культуру і каштоўнасці.
«Гэта таксама шанец паглядзець наперад і паказаць, як нашы краіны працуюць у партнёрстве, няхай гэта будзе для барацьбы са змяненнем клімату; ці рэагавання на канфлікт ва Украіне; ці выкарыстання гандлёвых і інвестыцыйных магчымасцяў альбо знаёмства з лепшым з нашага мастацтва і культуры», – гаворыцца ў паведамленні з рэзідэнцыі брытанскага манарха.
Гэта будзе першы дзяржаўны візіт брытанскага манарха з 2015 года, бо нябожчыца каралева Элізабэт II, маці Карла, перастала ездзіць за мяжу ў познім узросце.
Анонс першага каралеўскага візіту прагучаў праз некалькі дзён пасля таго, як адбылася сустрэча Карла III з прэзідэнтам Еўрапейскай камісіі Уршуляй фон дэр Ляен у Ўіндзарскім замку, а прэмʼер-міністр Вялікай Брытаніі Рышы Сунак абвясціў аб прарыве ў перамовах па вырашэнні спрэчкі аб гандлёвых дамоўленасцях Паўночнай Ірландыі пасля Brexit.
Паездка ў Францыю і Германію ажыццяўляецца па просьбе брытанскага ўрада і па запрашэннях урадаў дзвюх краін.
Апроч афіцыяльных пунктаў парадку дня візіту Карла III прадугледжаны шматлікія цікавосткі. Так у Францыі брытанскі кароль наведае Бардо, дзе пражывае вялікая брытанская супольнасць. Каралеўская пара плануе наведаць арганічны вінаграднік і адзін з раёнаў, спустошаных ляснымі пажарамі мінулым летам. У Германіі запланавана сустрэча Карла і Камілы з украінскімі бежанцамі, наведванне сумеснай брытанска-нямецкай вайсковую часткі і знаёмства з праектамі ўстойлівай энергетыкі ў Гамбургу.
Цікавы момант: брытанская каралеўская сямʼя даўно саступіла большую частку сваіх паўнамоцтваў абраным лідарам краіны, аднак аўра манархіі, а таксама пампезнасць і цырымонія каралеўскіх візітаў па-ранейшаму разглядаюцца як спосаб палепшыць імідж Вялікай Брытаніі і ўмацаваць сувязі з краінамі па ўсім свеце.
Гэтую ролю вельмі ўдала ўвасабляла каралева Элізабэт II, якая за 70 гадоў праўлення здзейсніла 121 дзяржаўны візіт, атрымаўшы неафіцыйны тытул «Каралева свету».
Антон Тачняк belsat.eu
