Паводле паведамлення праваабаронцаў, траіх асуджаных вясноўцаў этапавалі ў розныя калоніі Беларусі.
Алесь Бяляцкі быў этапаваны ў папраўчую калонію № 9 у Горках. Гэтая калонія мае дурную славу, дзе зняволеныя, асабліва паводле палітычных артыкулаў, зазнаюць сапраўдныя катаванні.
Валянціна Стэфановіча адправілі адбываць пакаранне ў папраўчую калонію № 15 у Магілёве, а Уладзіміра Лабковіча – у шклоўскую папраўчую калонію № 17.
Прысуды вясноўцам агучыла 3 сакавіка 2023 года суддзя Марыя Запаснік. Алесь Бяляцкі атрымаў 10 гадоў калоніі ва ўмовах узмоцненага рэжыму, намеснік старшыні «Вясны» Валянцін Стэфановіч – 9 гадоў калоніі ва ўмовах узмоцненага рэжыму, юрыст і каардынатар кампаніі «Праваабаронцы за свабодныя выбары» Уладзімір Лабковіч – 7 гадоў ва ўмовах узмоцненага рэжыму.
Ніхто з вясноўцаў не прызнаў віны ні па адным з артыкулаў.
Раман Шавель belsat.eu
