1 снежня ў Дубаі адбылася ўрачыстая цырымонія адкрыцця Сусветнага саміту па барацьбе са зменамі клімату СОР 28 (працягнецца да 12 снежня). Мяркуецца, што ўдзельнікамі мерапрыемства ў першыя дні стануць каля 150 кіраўнікоў дзяржаваў. Прыехаў на саміт і Аляксандр Лукашэнка. Мы паглядзелі, з кім цягам дня паспеў сустрэцца беларускі палітык.
Тэлеграм-канал «Пул першага» вельмі старанна асвятляе ўсе спатканні Лукашэнкі, паказваючы ўсіх лідараў, з якімі бачыўся палітык. Пры гэтым зусім не значыць, што кожнае спатканне было роўным хаця б кароткім перамовам.
Так, у «Экспа-Сіці» Аляксандра Лукашэнку вітаў прэзідэнт ААЭ Мухамед бен Заід аль-Нахаян і генсек ААН Антоніў Гутэрыш.
Кулуарныя сустрэчы адбыліся з лідарамі Кубы, Зімбабвэ і Тога.
Як і анансаваў Лукашэнка перад паездкай, менавіта з афрыканскімі лідарамі ў яго было найбольш спатканняў, сярод іх былі прэзідэнты Батсваны, Экватарыяльнай Гвінеі, Конга і Кеніі.
З прэзідэнтам Зімбабвэ Эмерсанам Мнангагвай Лукашэнка сустрэўся асобна пасля цырымоніі адкрыцця.
З прэзідэнтам Кеніі Лукашэнка таксама правёў асобныя перамовы і паразмаўляў пра неабходнасць выбудовы плану развіцця двухбаковага супрацоўніцтва.
Як з даўнім сябрам прайшла сустрэча Лукашэнкі з прэзідэнтам Азербайджана Ільхамам Аліевым.
Удалося Аляксандру Лукашэнку сустрэцца таксама з лідарам Каморскіх выспаў і прэм’ер-міністрам Манголіі.
Асаблівай удачай можна лічыць сустрэчу з прэзідэнтам Сербіі Аляксандрам Вучычам. Менавіта побач з ім сядзеў Лукашэнка і на цырымоніі адкрыцця саміту.
Пазней Вучыч пераказаў, пра што яны размаўлялі з Лукашэнкам і паведаміў, што мае надзею на тое, што ўдасца арганізаваць візіт Лукашэнкі ў Сербію ў наступным годзе, дзе можна будзе «абмеркаваць усе асноўныя пытанні двухбаковага парадку дня».
А вось прэзідэнты Літвы, Латвіі і Польшчы не захацелі фатаграфавацца побач з Лукашэнкам на традыцыйным агульным фотаздымку з удзелам усіх лідараў.
«Было б крывадушна стаяць плячом да пляча з кіраўніком дзяржавы, якая стала плацдармам агрэсіі Раіі супраць Украіны, і як ні ў чым не бывала абмяркоўваць будучыню свету і змяненне клімату. Беларускі рэжым спрыяе разбурэнню будучага свету і разам з Расеяй нясе адказнасць за тое, што адбываецца ва Украіне – ад гібелі людзей да катастрафічнага ўздзеяння на навакольнае асяроддзе. Гэта называецца сямейным фота. Лукашэнка не належыць да той сям’і, да якой мы хочам належаць», – адзначыў прэзідэнт Літвы Гітанас Наўседа.
Раман Шавель belsat.eu