Новы суд над палітвязнем Сяргеем Ціханоўскім пачнецца 14 лютага, паведамляе праваабарончы цэнтр «Вясна». Палітыка вінавацяць паводле артыкулу «Злоснае непадпарадкаванне патрабаванням адміністрацыі папраўчай установы».
Новую справу супраць палітвязня Сяргея Ціханоўскага разгледзяць у гарадскім судзе Жодзіна, працэс будзе весці Іван Грынкевіч.
Паводле версіі следства, Ціханоўскі «сістэматычна дапускаў непадпарадкаванне законным патрабаванням адміністрацыі папраўчай установы, правакаваў канфлікты, у тым ліку з сукамернікамі, за што неаднаразова быў пад спагнаннем».
Пра гэтую справу супраць палітвязня стала вядома 16 студзеня. Тады абраная прэзідэнтка Святлана Ціханоўская, каментуючы новыя абвінавачанні, назвала іх абсурднымі.
«Ужо два з паловай гады майго мужа спрабуюць выставіць злачынцам. Для народу Беларусі Сяргей – па-ранейшаму ўвасабленне гонару, моцы і харызмы. І ніякія абвінавачванні ніколі гэтага не зменяць».
Да 18-гадовага тэрміну Ціханоўскаму цяпер могуць дадаць яшчэ 2 гады.
Сяргей Крот belsat.eu