Аб'ектыў 26.04.2017 Як адбываўся «Чарнобыльскі шлях – 2017» у Менску?


Час спыніць Астравецкую пачвару

У Менску адбыўся традыцыйны «Чарнобыльскі шлях». Сёлетнюю акцыю менскія ўлады дазволілі правесці паводле знаёмага маршруту – ад кінатэатру «Кастрычнік» да плошчы Бангалор.

«Чарнобыльскі шлях падтрымліваюць усе, у тым ліку адпаведная заява зʼявілася ад Беларускага нацыянальнага кангрэсу. І вось гэтае абʼяднанне – вельмі важнае, бо дае падставы, што апазіцыя ў будучым абʼяднаецца», – падкрэсліў актывіст Вячаслаў Сіўчык.

Перад пачаткам акцыі яе арганізатары заявілі, што пачаткова зацверджаны план змяняецца – замест мітынгу на плошчы Бангалор яго правялі на пляцоўцы каля Акадэміі навук.

Анархістаў гэтым разам на акцыі не было

Затое арыгінальны перформанс зладзілі прадстаўнікі экалагічнай арганізацыі «Зялёная сетка».

«Падобнымі акцыямі мы прыцягваем увагу і да падзеяў 30-гадовай даўніны і адначасова да пабудовы Астравецкай АЭС, бо гэта, магчыма, наступны Чарнобыль», – даводзіў старшыня Руху «За свабоду» Юрась Губарэвіч.

Што патрабавалі пратэстоўцы?

Удзельнікі сёлетняга «Чарнобыльскага шляху» патрабавалі не толькі спынення будаўніцтва беларускай АЭС, але і эканамічных рэформаў ды вызвалення ўсіх палітвязняў, у тым ліку ў справе патрыётаў.

«Сённяшні Чарнобыльскі шлях – гэта яшчэ і Астравецкі шлях. Гэта шлях ад Чарнобыля экалагічнага да Чарнобыля палітычнага. Таму што калі ў цэнтры сталіцы чорна ад спецназу, гэта Чарнобыль палітычны. Калі сядзяць за кратамі патрыёты – гэта палітычны Чарнобыль», – мяркуе сустаршыня БХД Павал Севярынец.

Пасля мітынгу ды прыняцця адпаведнай рэзалюцыі калона ў складзе некалькіх соцень удзельнікаў рушыла па праспекце Незалежнасці ды вуліцы Сурганава ў бок плошчы Бангалор, каб ускласці кветкі да Чарнобыльскай капліцы ў памяць пацярпелых ад аварыі на Чарнобыльскай АЭС.

КХП БНФ зарганізавала

Паралельна ў Кіеўскім скверы Кансерватыўна-хрысціянская партыя «Беларускі народны фронт» зладзіла сваю акцыю, таксама дазволеную ўладамі, да якой пазней далучылася частка тых, хто ішоў ад кінатэатру «Кастрычнік».

Наступны пратэставы дзень для апазіцыі – 1 траўня. У гэты дзень запланаваныя дзве акцыі: першую ладзяць незалежныя прафсаюзы, другую – лідар Беларускага нацыянальнага кангрэсу Мікола Статкевіч.

Віталь Бабін, «Белсат», фота: Vasily Fedosenko / Reuters / Forum

Глядзі таксама
Каментары