Да запаветных пяцісот засталося няшмат. У чэрвені сярэдні заробак па Беларусі быў ужо $ 432. Калі выплаты працоўным працягнуць расці такімі тэмпамі і надалей, то могуць дасягнуць абяцанай Лукашэнкам лічбы ў наступным годзе. Прынамсі на паперы.
Эканамічны рост – вынік паразітавання
Існае ажыўленне беларускай эканомікі ёсць адлюстраваннем небывалага за апошнія 10 гадоў эканамічнага падʼёму ў свеце. Рухавіком гэтага аздараўлення выступаюць краіны Еўразоны, такія, як Нямеччына, Францыя, Італія ды Іспанія. Сярод іншага, яны спажываюць больш нафты і нафтапрадуктаў, якія Беларусь ды Расея экспартуюць на захад. Расея, у выніку, мае больш грошай на набыццё беларускае тэхнікі. Беларускі эканамічны рост, аднак, адстае ад сусветнага ў разы – праз тэхналагічную адсталасць нашае краіны.
«Калі для ЗША і Еўразоны рост у межах 2 % гэта – вельмі добра, то для такой краіны як Беларусь рост меншы, чым 3-4 % гэта – паталагічнае адставанне ад астатняга свету», – даводзіць эканаміст Леанід Фрыдкін.
Паводле прадуктыўнасці працы, адстаем ад развітых краінаў у 5 разоў
У выніку, хоць заробкі і павялічваюцца на шэрагу прамысловых гігантаў, у энергетыцы ды некаторых іншых галінах, але бальшыня апытаных намі жыхароў Менску паляпшэння не адчулі.
Заробак $ 500 долараў за месяц будзе дасягнуты ў снежні
Запаветныя пяць франклінаў кожны сярэдні працаўнік атрымае дзякуючы прэміям або гэтак званаму трынаццатаму заробку. Але трывалага замацавання гэтага ўзроўню напэўна не будзе.
У прадпрыемстваў проста не хопіць грошай для такога павелічэння заробкаў. Для гэтага трэба вельмі істотны рост выручкі, які прадпрыемствы, пры існай канʼюнктуры замежных і ўнутранага рынку, забяспечыць не могуць», – падсумоўвае спадар Фрыдкін.
Істотная роля ў сёлетнім павелічэнні заробкаў прыйшлася на скарачэнне працоўных месцаў. З пачатку года ўлады звольнілі на 33 тысячы чалавек болей, чымся прынялі на працу.
Станіслаў Івашкевіч, «Белсат», фота: Vasily Fedosenko / Reuters / Forum
