У адміністрацыю Маскоўскага раёну Менску на сустрэчу з памочнікам кіраўніка краіны Аляксандрам Якабсонам прыйшлі прадстаўнікі апазіцыі, а таксама дзясяткі людзей, якіх дзяржава залічыла ў дармаеды. Кожны прынёс сюды свае прэтэнзіі.
Незалежных журналістаў на сустрэчу не пусцілі. Аднак, паводле прысутных, далёка не ўсе, хто сюды прыйшоў, могуць разлічваць на вызваленне ад падатку.
«Мне з сумным тварам сказалі, што мы вам паведамім пра нашыя высновы», – кажа ўдзельніца сустрэчы.
На спатканне з Наталляй Качанавай у Жодзіне пусцілі толькі дзяржаўныя медыі. Згодна з імі, сурʼёзных праблемаў чыноўніца не заўважыла, а шматлікія скаргі грамадзянаў у найвышэйшыя інстанцыі патлумачыла маруднаю працаю мясцовых органаў.
«Гэта паказнік працы мясцовых органаў. Калі павялічваецца колькасць паўторных зваротаў, павялічваецца колькасць зваротаў у вышэйшыя інстанцыі – гэта сігнал, што некаторыя пытанні не дапрацоўваюць», – крытыкуе спадарыня Качанава.
Гэткія сустрэчы адбыліся ў шматлікіх выканкамах па ўсёй краіне. Аднак ці палепшаць яны лёс людзей, якіх дзяржава прымушае заплаціць немалы падатак?
«Самае лепшае і самае простае, што можна зрабіць гэта шчыра сказаць: мы зрабілі памылку, мы яе прызнаём, адмяняем указ, а канцэнтруемся на праграме Мільён новых працоўных месцаў, якія прапануе АГП, і ствараем новыя працоўныя месцы», – жартаўліва прапаноўвае Анатоль Лябедзька, лідар Абʼяднанай грамадзянскай партыі .
Пакуль гаворка пра гэта не вядзецца. Раней дэпутатка Палаты прадстаўнікоў ад АГП Ганна Канапацкая атрымала адказ з Адміністрацыі прэзідэнта пра мэтазгоднасць «падатку на дармаедаў». Маўляў, дэкрэт спрыяе скарачэнню ценявой эканомікі, а таксама ўцягвае грамадзянаў у дазволеныя законам віды дзейнасці. Насамрэч «лісты шчасця» выклікалі абурэнне значнай часткі беларускага насельніцтва. У розных кутках краіны прайшлі стыхійныя акцыі пратэсту.
У Гомлі пачаўся першы суд гэтак званага дармаеда супраць падатковай інспекцыі. Гомелец Аляксандр Сямёнаў намагаецца давесці незаконнасць спагнання падатку.
Сёння ў Берасці прайшла новая акцыя нязгоды.
А заўтра ў Менску пройдзе «Марш абураных беларусаў» супраць дэкрэту «Аб сацыяльным утрыманстве».
«Калі мы пагодзімся на гэтую дурасць, на гэтае варʼяцтва з нас далей ужо будуць віць вяроўкі, з нас будуць рабіць усё, што захочуць. Таму 17 лютага а 18 гадзіне я заклікаю ўсіх тых, хто падпаў пад гэты закон, і хто не падпаў – прыходзіць на Кастрычніцкую плошчу», – заявіў суарганізатар маршу паэт Уладзімір Някляеў.
Паводле агучанага сёння плану, пратэстоўцы збіраюцца прыйсці да будынку Міністэрства падаткаў і збораў, каб патрабаваць адмены «падатку на дармаедаў».
Ян Бабіцкі, «Абʼектыў»