Берасцейская вобласць апошнім часам прыцягвае шмат увагі з боку эколагаў і актывістаў. Будаўніцтва акумулятарнага заводу каля Берасця можа моцна змяніць экалагічны баланс рэгіёну і гэта пры тым, што тут ужо маюцца тоны невядомага хімічнага рэчыва каля пасёлку Зялёны Бор.
У пасёлку Зялёны Бор, што на Берасцейшчыне, пад адкрытым небам ляжаць тоны невядомага рэчыва. Паводле журналісцкіх расследаванняў, у гэтым месцы захоўваюць небяспечны для чалавека і асяроддзя свінцовы попел. Прадукт перапрацоўкі ляжыць тут не першы год.
«Мы ведаем, што гэта вельмі небяспечна для жыцця і здароўя. Вельмі шмат людзей стала хварэць у пасёлку апошнія гады. Дарослае насельніцтва, і дзеткі таксама», – кажуць мясцовыя жыхары.
Далей за абяцанні справа не пайшла
Жыхары пасёлку доўгі час не ведалі, што маюць такое небяспечнае суседства. Як раней паведамлялі мясцовыя медыі, белаазёрскае прадпрыемства, што займаецца перапрацоўкай свінцу, падпісала дамову з індывідуальным прадпрымальнікам. Прадпрыемства нібыта пастаўляла ў Зялёны Бор свінцовы попел для далейшай перапрацоўкі. Паводле журналісцкіх звестак, прадпрымальнік збіраўся выкарыстоўваць яго для далейшай вытворчасці ды нават экспартаваць у Расею. Далей за абяцанні справа не пайшла.
«Займаліся органы, значыць органы ўнутраных справаў, гэтым пытаннем, на дадзены момант я нават не ведаю, у чым там пытанне. Ведаю, што гэтая сітуацыя ёсць, што вядзецца следства, Следчы камітэт займаецца гэтым пытаннем, але да чаго яны дайшлі і якое рашэнне ў выніку, я не ведаю», – кажа намеснік старшыні Івацэвіцкага райвыканкаму Андрэй Рэгес.
Афіцыйна гэтыя адкіды адносяцца да трэцяй катэгорыі небяспечнасці. Паводле ўладаў, яны не ствараюць небяспекі для людзей і экалогіі. Але ёсць і іншае меркаванне.
«Наступствы гэтага складана сабе ўявіць, ці ёсць там сапраўдныя меры, якія будуць перадухіляць траплянне гэтых свінцовых адкідаў, яшчэ нейкіх розных цяжкіх металаў, што вельмі небяспечныя для жыцця чалавека і ў прынцыпе экалогіі, у глебу і навакольнае асяроддзе – да жывёлінаў, напрыклад», – кажа экалагічны актывіст Вячаслаў Касінераў.
Жыхары тым часам пачалі збор подпісаў пад зваротам да кіраўніка краіны. У звароце людзі просяць адстаўкі некаторых прадстаўнікоў мясцовай улады. Аргументавалі яны гэта адсутнасцю даверу ў сітуацыі небяспекі.
Міхась Слаўнікаў, «Белсат»
