Сітуацыя з беспрацоўем паляпшаецца, сцвярджае Нацыянальны статыстычны камітэт. Паводле сітуацыі на чэрвень, за апошні год афіцыйна зарэгістраваных беспрацоўных у Беларусі паменела на 13 тысячаў чалавек. Гэта азначае скарачэнне больш чым на чвэрць.
Але, як вынікае з той жа афіцыйнай статыстыкі, тое, што колькасць афіцыйных беспрацоўных змяншаецца, не азначае, што гэтыя людзі былі працаўладкаванныя. За 12 месяцаў, што прайшлі з мінулага чэрвеня да гэтага, колькасць прынятых на працу перавысіла колькасць звольненых толькі двойчы – у верасні і кастрычніку мінулага года. Агулам жа за гэты перыяд тых, хто страціў працу, было на 64 тысячы чалавек болей, чым тых, хто здолеў уладкавацца.
Гамяльчук Аляксандр Лебедзеў, які адбыў турэмнае пакаранне 7 месяцаў таму, беспаспяхова спрабуе знайсці працу праз цэнтр занятасці з красавіка. Бесперспектыўнасць такіх пошукаў змусіла яго выйсці на вуліцу з плакатам – дапамажыце знайсці працу.
«Схадзіце на біржу паглядзіце, якая там праца. Там па 50 чалавек на месца, калі зʼяўляецца нешта», – даводзіць Аляксандр.
Паводле Нацыянальнага статыстычнага камітэту, колькасць занятых у эканоміцы скарацілася за апошні год на 46 тысячаў чалавек. А з улікам зніклых беспрацоўных – на 60 тысяч працаздольных асобаў.
Сярод крыніцаў уцечкі адмыслоўцы адзначаюць дэмаграфію і працоўную міграцыю. Яшчэ адна прычына выключэння з ліку працоўнай сілы, паводле правілаў статыстыкі, гэта тое, што чалавек зняверыўся, што знойдзе працу, і перастаў яе актыўна шукаць. У Нацыянальным статыстычным камітэце нам заявілі, што толькі фіксуюць факт змяншэння працоўнай сілы, але не адсочваюць яе прычынаў.
Станіслаў Івашкевіч, «Белсат», фота: Vasily Fedosenko / Reuters / Forum