Паўмільёны дармаедаў хаваюцца ў Беларусі ад падаткаў. Так лічыць кіраўніцтва краіны. Першы этап вайны з гэтак званымі ўтрыманцамі не прынёс уладам жаданых вынікаў. Аднак саступаць у дзяржаўных кабінетах не збіраюцца. Некалькі дзён таму Аляксандр Лукашэнка чарговы раз заявіў, што дэкрэту № 3 адмяняць не будзе.
Апаненты Лукашэнкі расчараваныя. Маўляў, улада дагэтуль не зрабіла ніякіх высноваў.
Паводле прадстаўнікоў апазіцыі, нягледзячы на тое, што пратэсты пакуль спыніліся, у грамадстве расце сацыяльная напружанасць. У сваю чаргу абяцанне Лукашэнкі абнавіць дэкрэт № 3 да 1-га кастрычніка не спрыяе стабілізацыі. Таму Правацэнтрысцкая кааліцыя выходзіць са сваёй прапановаю.
«Да пачатку верасня будзе прапанаваная народная альтэрнатыва дэкрэту № 3. Яна ўключыць прапановы незалежных эканамічных экспертаў», – зазначыў Віталь Рымашэўскі з партыі Беларуская хрысціянская дэмакратыя.
Элементы напрацовак эканамічных праектаў ужо маюць чальцы Працэнтрысцкай кааліцыі. У структуру ўваходзіць Абʼяднаная грамадзянская партыя, рух «За свабоду», аргкамітэт у стварэнні партыі Беларуская хрысціянская дэмакратыя.
«Мы ставім задачу раздзел праграмы, які датычыць у першую чаргу пытання стварэння новых працоўных месцаў. Гэта тое, над чым улада зусім не працуе. Другі кірунак: якім чынам зрабіць выгадным для людзей дэклараванне сваіх даходаў», – падзяліўся Анатоль Лябедзька, лідар АГП.
Чальцы палітычнага блоку абяцаюць, што гэтая частка праграмы разам з іншымі элементамі ўвойдзе ў супольную эканамічную платформу, з якою Правацэнтрысцкая кааліцыя збіраецца ісці на будучыя выбары ў мясцовыя саветы дэпутатаў.
Ці прымусіць Аляксандр Лукашэнка плаціць падатак на дармаедства асобаў, якія не могуць знайсці працу? У гэтым выпадку апазіцыя абяцае новыя пратэсты. Дзеля гэтага Правацэнтрысцкая кааліцыя заявіла пра план стварэння адмысловай сеткі аргкамітэтаў.
Ян Бабіцкі, «Белсат», фота: Rymakov Vadim / ITAR-TASS / Forum