Лёгкая атлетыка
Міжнародны алімпійскі камітэт падтрымаў пастанову Міжнароднай асацыяцыі лёгкаатлетычных федэрацыяў, якая раней адхіліла ўсіх лёгкаатлетаў Расеі ад міжнародных спаборніцтваў. МАК не стаў адлучаць ад Летніх Алімпійскіх гульняў у Рыа-дэ-Жанэйра ўсіх расейскіх спартоўцаў. Аднак лёгкаатлетычная каманда нашых суседзяў цалкам не здолее выступаць на гульнях пад сцягам Расеі.
Футбол
Зборная Расеі з ганьбаю пакідае чэмпіянат Еўропы па футболе. Дружына Леаніда Слуцкага (які, дарэчы, узяў усю адказнасць за праваленае першынство і падаў у адстаўку) у апошнім матчы групавога этапу была разгромленая Ўэльсам 3:0 і заняла апошні радок у групе з адным балам. Мабыць, тут праблема не ў тым, хто трэніруе Расею: Слуцкі, Капэла ці Хідынк з Мурынню – пакуль у футбалістаў не зменіцца менталітэт, нічога кардынальна не палепшае.
Лідары квартэту – Нямеччына і Польшча – маюць 4 балы кожная. «Бела-чырвоныя» у Марселі згуляюць з Украінаю, «жоўта-блакітныя» на гэтым турніры яшчэ балаў не набіралі ды не забівалі, а прапусцілі ўжо 4 мячы. Двубой супраць палякаў стане для каманды Фаменкі матчам прэстыжу. Сам настаўнік ужо заявіў, што гэта будзе ягоны апошні двубой у якасці галоўнага трэнера «жоўта-блакітных».
Дзейныя чэмпіёны свету, немцы, у Парыжы праэкзаменуюць зборную Паўночнай Ірландыі, якая мае ў сваім актыве 3 балы. Пасля двух матчаў на групавым этапе на «бундэс-тым» вылілася досыць шмат крытыкі ад фанатаў і прэсы.
Не заціхае футбольнае жыццё і ў нашай краіне, дзе былі згуляныя апошнія тры матчы 13 туру. Сенсацыйна скончыўся двубой на полі сталічнага стадыёну «Трактар», дзе менскае «Дынама» саступіла аўтсайдару табліцы «Нёмну», 0:1.
Фота – athletics-club.ru
