Ствараць дык ствараць! Выконваючы загад Лукашэнкі аб стварэнні беларускай прышчэпкі ад каронавіруса, прадпрыемства «БелВітуніфарм» так разагналася, што пачало распрацоўваць вакцыну ад алкагалізму. Ну, як ад алкагалізму – ад яго наступстваў. Што вядома пра гэтую ды іншыя навінкі «БелВітуніфарму»?
Глядзіце сюжэт у нашым відэа:
«Каб чалавек заставаўся чалавекам» – з гэтаю мэтаю на прадпрыемстве «БелВітуніфарм» пачалі працу над вакцынай ад алкагалізму. Гендырэктар прадпрыемства Сяргей Бальшакоў у эфіры тэлеканалу «Беларусь 1» распавёў, што вакцына дапаможа захаваць якасць жыцця людзей, якія ўжываюць алкаголь:
«Мы будзем бароцца з вынікам п’янства, а не з самім пʼянствам. Скажу адразу тым, хто ўзрадаваўся вакцыне: пахмельны сіндром застанецца, але мы разлічваем, што чалавек пасля пэўных складанасцяў вернецца ў нармальныя шэрагі і не будзе апускацца ніжэй па сацыяльнай лесвіцы».
Аналагаў такой вакцыны ў свеце пакуль яшчэ няма, але на пяткі беларускім навукоўцам ужо наступаюць калегі са ЗША. Там таксама распрацоўваюць вакцыну ад алкагалізму, механізм яе дзеяння наступны: прэпарат аднаўляе ўзровень дафаміну ў мазґах, што мусіць зрабіць чалавека больш задаволеным і, адпаведна, зменшыць патрэбу ў алкаголі як у сродку хуткага пераадолення праблемаў.
«Гэта не зусім вакцына ў звыклым для нас разуменні. Бо залежнасць – не інфекцыйнае захворванне. І, адпаведна, імунітэт тут ніяк не працуе. Мабыць, недзе ў будучыні будзе так, што зрабілі прышчэпку – і чалавеку не страшны алкагалізм. Але на сённяшні дзень гэта сістэмная праца. Гэта і сацыяльная праграма, і псіхалагічная дапамога, і папулярызацыя дапамогі, а не стыгматызацыя, як у нас да сёння ідзе», – патлумачыў лекар-псіхіятр-нарколаг Павел Перапёлкін.
Пацыенты, якім бы прыдалася вакцына ад алкагалізму, у Беларусі дакладна ёсць. Паводле звестак Белстату, у 2022 годзе ў краіне было зарэгістравана больш за 14 тысяч пацыентаў з алкагалізмам. Гэта амаль на 20 адсоткаў меней, чым 5 гадоў таму. Менш за ўсё хворых на алкагалізм жыве на Гарадзеншчыне, а найбольш – на Гомельшчыне. Паводле нашага эксперта, гэтыя лічбы значна заніжаныя.
«Што мяне ў гэтай навіне больш уразіла, што нібыта вы піце, а мы зробім пры гэтым так, каб вам было добра. І вось гэта можа стварыць ілюзію бяспекі ўжывання алкаголю. Таму як гэта прышчэпка будзе працаваць, у які бок – вялікае пытанне. І ў рэаліях беларускіх, хутчэй за ўсё, ад гэтага стане толькі горш», – лічыць псіхіятр і нарколаг Павел Перапёлкін.
Магчыма, болей шанцаў на поспех атрымаюць беларускія вакцыны ад сапраўдных вірусаў: воспы, гепатыту, грыпу і нарэшце каронавіруса. Іх распрацоўваннем таксама пахваліліся на «БелВітуніфарме». Апошнюю Лукашэнка загадаў стварыць яшчэ ў сакавіку 2021 года. Чаму выраб забраў столькі часу, вядучы мікрабіёлаг прадпрыемства патлумачыў у эфіры тэлеканалу «Беларусь 1»:
«Праект вырабу вакцыны супраць COVID-19 патрабуе адукацыі персаналу, атрымання навыкаў працы на тэхналагічным новым абсталяванні і асваення новых тэхналогіяў. Таму такі доўгі працэс», – пракаментаваў вядучы мікрабіёлаг «БелВтуніфарму» Віктар Чыжэўскі.
За час распрацоўвання айчыннай вакцыны зʼявілася шмат новых штамаў вірусу. EG.5 Eris, які распаўсюджваецца па свеце цяпер, хутчэй абыходзе імунную абарону чалавека і пранікае ў клеткі. Вакцыны ад яго яшчэ няма. Гэты штам можа зʼявіцца ў Беларусі ўжо бліжэйшым часам.
«Тэарэтычна магчыма змадыфікаваць гэтую новую вакцыну да гэтых новых штамаў каронавіруса. Зацікаўленасць людзей у вакцыне супраць каронавіруса ўжо не такая актуальная, так што не ведаю, ці гэта была фактычная патрэба, ці гэта проста былі амбіцыі кіраўніцтва, каб зрабіць сваю вакцыну», – патлумачыў лекар агульнай практыкі Антон Юран.
Міністэрства аховы здароўя ўжо даўно не публікуе афіцыйных звестак аб захворванні на COVID-19. Але паводле Алены Казарэз, загадчыцы кафедры інфекцыйных хваробаў Гарадзенскага медычнага ўніверсітэту, гэта адзінкавыя выпадкі.
Аліна Скрабунова, «Белсат»
