Адмовіцца ад выпускных экзаменаў для адзінаццацікласнікаў вырашыла Міністэрства адукацыі. Сёлета іспыты пройдуць, але налета замест іх будзе цэнтралізаваны экзамен. Ён будзе складацца з матэматыкі ды адной з дзяржаўных моваў – на выбар… Пасля гэтага выпускніка чакае яшчэ і цэнтралізаванае тэставанне. Якая асноўная ідэя закладзеная ў новаўвядзенні Міністэрства адукацыі ды ці спросціць яна жыццё выпускнікам?
Глядзіце сюжэт у нашым відэа:
Два дні да апошняга званка. Для 11-класнікаў ён будзе самым апошнім. Пасля – выпускныя экзамены па асноўных прадметах. Выпускніца 20-га года – мянчанка Таццяна ананімна распавяла, як яны праходзяць.
«У нас гэта праводзяць нашыя ж настаўнікі ў сваіх кабінетах. У сваіх класах усе адно аднаму дапамагаюць, выдатнікаў падцягваюць, усім усё падкажуць, на спісванне лішні раз заплюшчаць вочы».
Налета выпускнікі 11-ых класаў не будуць здаваць традыцыйных экзаменаў. Мінадукацыі ўводзіць травеньскі Цэнтралізаваны экзамен, які ў іх будуць прымаць па-за школаю па двух прадметах: матэматыка і мова – расейская ці беларуская – на выбар.
«Базавыя веды, якімі мае валодаць чалавек – гэта гісторыя, мова, культура. Матэматыка ў гэтыя абавязковыя веды не ўваходзіць. Школа дастаткова дае базавых навыкаў ледзь не ў пачатковай школе: дробу, адсоткі, вусны лік», – узгадвае нядаўняя выпускніца Таццяна.
Такім чынам, у 2023-ім годзе пазбегчы сур’ёзнага іспыту па матэматыцы і адной з моваў будзе не магчыма. Сёлета – яшчэ ўдасца, паколькі іх можна абмінуць у Цэнтралізаваным тэставанні. Супакойвае, што сертыфікат цэнтралізаванага іспыту можна будзе падаць пры паступленні ў ВНУ замест выніку тэставання, калі матэматыка ці мова – у спісе патрэбных па абранай спецыяльнасці.
Яшчэ адметна, што давезці дзяцей да месца правядзення агульнага экзамену – будзе абавязкам школы, адзначае кіраўнік праекту «Народны падручнік» Сяргей Альшэўскі:
«Як школа гэта будзе рабіць? У бюджэтах школ ёсць на гэта грошы? Хто будзе адказваць за перавозку дзяцей? Мы ведаем, што такая перавозка – гэта асобная працэдура, якая вымагае ўзгаднення з ДАІ», – кажа эксперт.
Сяргей Альшэўскі звярнуў увагу, што агульны экзамен будуць здаваць толькі выпускнікі 11-га класу ў школе. Навучэнцы ПТВ ці сярэднеспецыяльнай навучальнай установы, якія ў яе межах сканчаюць школьную праграму, здаваць адзіны экзамен не будуць.
«На мой гэта супярэчыць патрабаванням змененага кодэксу аб абавязковасці агульнай сярэдняй адукацыі як мінімум з таго боку, што выпускнікі прафтэху не будуць здаваць адзіны экзамен. То бок мы прафтэх вышэй ставім, чым школьнікаў? Няроўныя ўмовы?» – пытаецца Сяргей Альшэўскі.
Замест дыскрымінацыі часткі дзяцей і дадатковага стрэсу эксперт прапануе прыйсці да адзінага экзамену і адмовіцца ад Цэнтралізаванага тэставання ў сённяшнім выглядзе.
Арцём, які скончыў школу ў 20-ым годзе, узгадвае адметнасці ТЦ:
«Адносна абʼектыўнасці там сапраўды ёсць праблемы. Было шмат выпадкаў, калі прыходзілі настаўнікі і дзеля цікавасці тэставаліся. Самым папулярным быў кітайскі. Чалавек, які не ведае кітайскай, прыйшоў і здаў на 30 балаў. Як такое магчыма?», – смяецца Арцём.
Сёлетнія чатыры іспыты – дзяржаўная мова, замежная мова, матэматыка і гісторыя Беларусі – 11-класнікі пачнуць здаваць першага чэрвеня. Налета – гісторыя краіны і замежная мова застануцца за бортам.
Юлія Цяльпук, «Белсат»