Латвія працягне адсылаць назад у Беларусь асобаў, якія спрабуюць нелегальна мінуць мяжу. Пра гэта сёння заявіў кіраўнік Кабінету міністраў Латвіі Крыш’яныс Карыньш.
Паводле слоў Крыш’яныса Карыньша, мігранты, якія адчуваюць небяспеку ў сябе на радзіме, могуць прасіць прытулку ў Беларусі.
За апошнія содні памежнікі Літвы і Латвіі вярнулі ў Беларусь больш за сотню асобаў, якія намагаліся незаконна мінуць мяжу. Паводле літоўскіх памежнікаў, трапіць у Літву на розных участках часта спрабуюць адныя і тыя ж людзі. З беларускага боку перыядычна чуваць аўтаматныя стрэлы.
А ў літоўскіх лагерах утрымання мігрантаў пачалі сваю працу мабільныя брыгады Дэпартаменту міграцыі, што рэгіструюць ды інфармуюць асобаў, якія трапілі ў краіну нелегальна.
«Галоўнае – гэта інфармаванне аб працэдурах, якія іх чакаюць: як доўга, што будзе зроблена, якія перспектывы іх чакаюць. Таксама інфармуем аб магчымасці вярнуцца дамоў дабравольна, бо Літва прапануе ім квіток на самалёт і 300 еўраў кожнаму», – кажа Эвеліна Гудзінскайце, дырэктарка Дэпартаменту міграцыі Літвы
Адзін з такіх лагераў – у будынку былой школы ў вёсцы Відзяняй. У асноўным тут застаюцца грамадзяне Малі і Самалі.
«Спачатку мясцовыя жыхары ставіліся негатыўна, бо гэта было нечакана і адразу столькі мігрантаў. Але пасля стаўленне змянілася. Мясцовыя жыхары прыносяць ежу, вопратку, гуляюць з мігрантамі ў футбол», – распавядае кіраўнік самакіравання Варэнскага раёну Альвідас Вярбіцкас.
Акрамя прадстаўнікоў Дэпартаменту міграцыі, у складзе мабільных групаў – памежнікі, прадстаўнікі Міністэрства замежных справаў і перакладчыкі з арабскай, курдскай ды французскай моваў.
«Існуе шмат прычынаў, у кожнага свая гісторыя. Пачынаючы з культурніцкіх момантаў, сямейных канфліктаў. Для некаторых прычынаю прыезду сюды сталася вайна», – кажа перакладчык Ібрагім Гішам.
Эрвэ – студэнт. Два гады таму ён прыехаў з Камеруну ў Беларусь, аднак ня здолеў аплочваць навучання.
«Я паехаў у Беларусь як студэнт, бо мне не патрэбная была віза. Я проста прыехаў у аэрапорт і паляцеў у Беларусь. У маёй краіне не цярпімыя да такіх людзей як я, бо я гомасэксуал. У Камеруне я магу атрымаць пяць гадоў турмы ці проста быць забітым», – распавядае Эврэ.
З пачатку года мяжу Літвы з Беларуссю незаконна мінулі больш за 4 тысячы мігрантаў, абсалютная большасць – іракцы. Пакуль магчымасцю дабравольна вярнуцца на радзіму з фінансаваю дапамогаю літоўскага ўраду скарысталіся каля двух дзясяткаў чалавек.
Алесь Баразенка, «Белсат»
