Хочаш гуляць у чэмпіянаце Беларусі, але ў 2020-ым падпісаў ліст супраць ґвалту сілавікоў. Паводле Міністэрства спорту, выйсце адно: пакаяцца. Гэтым разам, каб вярнуцца ў БАТЭ, у «пакаянным» відэа разам з прапагандыстамі ўзяў удзел былы брамнік нацыянальнай зборнай Аляксандр Гутар.
Глядзіце сюжэт у нашым відэа:
Апошнім часам галкіпер выступаў за казахскі «Акс». Аднак праз дрэнныя паказнікі быў вымушаны скасаваць з камандаю кантракт. Каб ізноў працягнуць кар’еру ў Беларусі, яму спатрэбілася пакаяцца за выказванні ў 2020-ым.
«У 2020 годзе я ўзяў удзел у запісе відэа супраць гвалту, але мэту пераследаваў толькі адну – каб канфлікт хутчэй завяршыўся. Нікога ні да якіх радыкальных дзеянняў не заклікаў. На жаль, іншы бок перавярнуў усё на сваю карысць. Я заявіў, што ні ў чым браць удзелу не буду і ніякіх спісаў падпісваць не збіраюся. Я не ёсць і ніколі не быў нейкім апазіцыянерам, не цікавіўся і не цікаўлюся палітыкай. Я футбаліст і мушу займацца сваёй справаю», – заявіў былы брамнік зборнай Беларусі па футболе Аляксандр Гутар.
Таксама Гутар дадаў, што ні на адзіны «дэструктыўны канал» падпісаны не быў і іх не чытаў. Паводле галкіпера, патрыёты цяпер у сваёй краіне, а не за яе межамі.
«Калі ты ў Беларусі, то патрыёт, калі не – то не патрыёт. Дзіўна гэта чуць ад спартоўца, які сам выязджаў за межы краіны, каб зарабіць грошай, і тады гэта здавалася натуральным», – заўважыў Алег Гаруновіч, галоўны рэдактар «tribuna.com».
У стылі праўладных спартоўцаў Гутар заявіў, што для яго вялікі гонар выступаць за нацыянальную каманду.
«Я не да канца разумею, ці перастала ягоная жонка Марыя Някрасава быць патрыёткаю, калі мінула беларускую дзяржаўную мяжу. І ўвогуле, як працуе гэты прынцып вызначэння патрыятызму паводле геаграфічнай прыкметы», – падкрэсліў Алег Гаруновіч галоўны рэдактар «tribuna.com».
Крыху раней «пакаянным» відэа адзначаўся і былы гулец нашай нацыянальнай футбольнай зборнай Станіслаў Драгун. У 2020-ым ён падпісаў ліст супраць ґвалту, а пазней яму не дазволілі гуляць у Беларусі.
«Для мяне ні Гутар, ні Драгун ніяк у маіх вачах не змяніліся. Я не хачу іх называць ахвярамі, бо яны ў іншым месцы, за кратамі. Гэта проста прыстасаванцы, як ёсць», – распавёў Яраслаў Пісарэнка, блогер з каналу «Честнок».
Цяпер за кратамі – дзясяткі людзей, звязаных са спортам. Толькі напярэдадні за каментары ў сацыяльных сетках у Горадні сілавікі затрымалі двух прадстаўнікоў футбольнага клубу «Нёман».
Павел Алейнікаў, «Белсат».