Улады Беларусі знайшлі чатыры пляцоўкі, дзе могуць хаваць радыеактыўныя адкіды з БелАЭС
Для будаўніцтва пункту пахавання радыеактыўных адходаў ад Беларускай АЭС вывучаюцца чатыры пляцоўкі. Канчатковы выбар будзе зроблены да канца года, паведамілі ў Міністэрстве энергетыкі.
«Да цяперашняга часу праведзена сістэмная і глыбокая праца па даследаванні ўсіх раёнаў краіны на прадмет магчымасці збудавання пункта пахавання», – заявіў намеснік міністра энергетыкі Дзяніс Мароз.
Паводле яго, улічваліся ўсе аспекты – эканамічныя, сацыяльныя, экалагічныя. Сярод 118 раёнаў да гэтага часу адабрана для далейшых больш глыбокіх даследаванняў чатыры пляцоўкі.
Выбраць з іх адну трэба да канца гэтага года, пасля чаго матэрыялы абяцаюць прадставіць для далейшых грамадскіх абмеркаванняў.
Новапабудаваная БелАЭС ужо цяпер, падчас штатнай працы, апраменьвае людзей. Пра гэта казалі эксперты падчас сустрэчы, арганізаванай «Зялёнай сеткай». У сваю чаргу абраная прэзідэнтка Беларусі Святлана Ціханоўская адзначыла, што Астравецкая АЭС «становіцца бомбаю запаволенага дзеяння».
Якуб Хруст belsat.eu
